Ölkə ərazisində yağan intensiv yağıntılarla əlaqədar Lənkəran-Astara bölgəsinin ərazisindən axan Lənkərançayda suyun səviyyəsi 6, Viləşçayda 2, Balakən-Şəki bölgəsi ərazisindən axan Katexçayda 3, Əyriçayda 120, Qarasuçayda 103, Qusar rayonu ərazisindən axan Qusarçayda 43, Qarabağ və Şərqi Zəngəzur bölgəsinin ərazisindən axan Bərgüşadçayda və Oxçuçayda 1, Həkəriçayda isə 4 sm artım müşahidə olunub.

Bu barədə Milli Hidrometeorologiya Xidmətindən bildirilib.

Xidmətin Hidrologiya Mərkəzinin direktoru Asif Verdiyev qeyd edib ki, gecə saatlarında Şəki rayonu ərazisindən axan Şinçaydan sel keçib.

“Hazırda çayda azalma müşahidə olunur”, – o bildirib.

Respublikanın ən iri taxılçılıq rayonlarından olan Şəkidə biçin kampaniyası mütəşəkkil davam etdirilir. Cari mövsümdə rayonda 58 min 236,1 hektar taxıl sahəsinin məhsulunun biçilməsi nəzərdə tutulur. Taxıl əkinlərinin 24 min 63,7 hektarını buğda, 34 min 172,4 hektarını dən üçün arpa sahələri təşkil edir. Bu günədək 19 min 928 hektarı arpa, 1344 hektarı buğda olmaqla, 21 min 272 hektar sahənin məhsulu biçilib, 56 min 306 ton taxıl istehsal olunub. Hələlik hər hektardan orta məhsuldarlıq 26,4 sentner təşkil edir.

Bu barədə AZƏRTAC-ın bölgə müxbirinə Şəki Dövlət Aqrar İnkişaf Mərkəzinin bitkiçilik sektorunun baş məsləhətçisi Sahib Abdulhəmidov məlumat verib.

Qurum rəsmisi bildirib ki, tədarük olunan taxılın 52 min 610 tonu arpa, 3 min 696 tonu buğdadır. Arpa sahələrinin hər hektarından orta hesabla 26,4 sentner, buğda sahələrindən isə 27,5 sentner məhsul götürülüb.

Hazırda sahələrdə 117 taxılbiçən kombayn işləyir. Fermerlər məhsulun qısa müddətdə biçilib anbarlara yığılması üçün bütün qüvvələri səfərbər ediblər.

Qurum rəsmisinin sözlərinə görə, rayonda istehsalçılardan yaş barama tədarükü də davam edir. Şəkili kümçülər indiyədək qəbul məntəqəsinə 8 ton 765 kiloqram yaş barama təhvil veriblər.

Ötən gündən başlayaraq Azərbaycanda hökm sürən qeyri-sabit hava şəraiti bir sıra fəsadlara yol açıb.

Bu barədə Fövqəladə Hallar Nazirliyi məlumat yayıb.

Bildirilib ki, güclü külək səbəbindən Qaraməryəm-İsmayıllı-Şəki magistral avtomobil yolunun Qəbələ rayonunun Nohurqışlaq kəndi ərazisindən keçən hissəsində irigövdəli ağacın aşması və nəticədə magistiral yolda hərəkətin dayanıb. Əraziyə cəlb edilmiş Şimal-qərb Regional Mərkəzinin xilasediciləri tərəfindən müvafiq vasitələrlə aşmış ağacın hissələrə kəsilərək yoldan götürülməsi, bununla da magistral yolda sərbəst hərəkətin bərpası təmin edilib.

Bundan başqa, yağan intensiv yağışlarla əlaqədar Yevlax şəhərinin Cahangir Kərimov küçəsində fərdi yaşayış evinin həyətyanı sahəsinin subasmaya məruz qalıb. Nəticədə ev sahibinin köməyə ehtiyacının yaranması barədə daxil olan məlumata əsasən göstərilən ünvana cəlb edilən FHN-in Aran Regional Mərkəzinin xilasediciləri tərəfindən evdə köməksiz vəziyyətdə qalmış yaşlı qadın təhlükəsiz əraziyə təxliyə edilib.