XƏBƏRLƏR
“Şuşanın gənc bələdçiləri” layihəsinə hər bir gənc qoşula bilər
Azərbaycan Respublikası Gənclər Fondunun dəstəyi ilə “İnnovasiyaya Doğru” Gənclərə Dəstək İctimai Birliyinin həyata keçirdiyi “Şuşanın gənc bələdçiləri” layihəsi davam edir.
Layihə üzrə nəzərdə tutulan videotəlimlərin çəkilişləri başa çatıb. Qeyd edək ki, bələdçilik peşəsinin sirləri, eləcə də Şuşanın turizm potensialı, aktiv və mədəni marşrutların qurulması və sair mövzularda olan bu təlimləri hər bir gənc izləyə bilər. Bunun üçün istək müraciətlərini mövzu adı “Şuşanın gənc bələdçisi” olmaqla innovasiyayadogru@mail.ru ünvanına göndərə bilərlər.
Təşkilatın sədri Rəşad Cəfərov gənclərə çağırış edərək bu layihənin iştirakçısı olmağa, təlimlərdən yararlanaraq Şuşanın gənc bələdçisi olmağa dəvət edib: “Gənclər həyata keçirdiyimiz bu layihəyə qoşularaq bələdçilik peşəsinin sirlərini öyrənəcək, uğurlu təqdimat bacarıqlarını mənimsəyəcək, Şuşa turizm potensialı haqqında daha geniş məlumatlar alacaq, aktiv və mədəni marşrutlar barədə biliklərə sahib olacaqlar. Şuşanın gənc bələdçisi olmaq istəyən hər bir gənc müraciət etməklə layihəmizin bir parçasına çevrilə bilərlər.”
Ümumilikdə isə “Şuşanın gənc bələdçiləri” layihəsinin ideyası Şuşaya səfər etmək istəyən, bu səfərlərə bələdçilik etmək istəyən gənclər üçün olduqca faydalıdır. Həmçinin bu layihə Şuşaya virtual səyahəti də ifadə edir. Belə ki, hazırlanacaq sayt vasitəsilə hər kəs Şuşanın tarixi məkanları haqqında yazılı və səsli məlumatlar ala biləcək. Layihənin məqsədi Şuşaya qayıdış prosesində gənclərin həvəsləndirilməsi və iştirakı, gənclərin bələdçilik sahəsində mütəxəssis olmalarına dəstək olmaq, Şuşanın tarixi və mədəniyyəti ilə bağlı maarifləndirmə işində gənclərin iştirakını təmin etmək, gənclərin Şuşaya qayıdışını və orda işlə təmin olunmalarına qismən töhfə vermək, Şuşaya turist səfərlərinin təşkilində gənclərin fəalığının artırılması və iştirakına maraq yaratmaq, Şuşa haqqında virtual aləmdə maraqlı kontentin yaradılmasına çalışmaq və sairi əhatə edir.
Digər xəbərlərə də bax
ELM VƏ TƏHSİL
Azərbaycanda ali təhsil alan qadınların sayı artıb
Azərbaycanın dövlət və qeyri-dövlət ali məktəblərində 2023-2024-cü tədris ilinin əvvəlinə təhsil alan qadınların sayı 118 min 290 nəfər olub. Onlardan 100 min 529-u dövlət, 18 min 31-i isə özəl müəssisələrdə ali təhsil alıb.
Bu məlumat Dövlət Statistika Komitəsinin “Azərbaycanda təhsil, elm və mədəniyyət-2024” məcmuəsində əks olunub.
Rəsmi nəşrdə bildirilir ki, bu göstərici 2010-cu ildə 65 min 112, 2015-ci ildə 78 min 662, 2021-ci ildə 97 min 163 olub. 2022-ci ildə isə 111 min 583 qadın ali təhsil ala bilib.
XƏBƏRLƏR
FHN: Ötən sutka ərzində 59 halda yanğına çıxış olub
Fövqəladə Hallar Nazirliyinin (FHN) “112” qaynar telefon xəttinə daxil olmuş zənglər əsasında nazirliyin aidiyyəti qurumları tərəfindən ötən sutka ərzində 59 halda yanğına çıxış və 5 halda köməksiz vəziyyətdə qalma faktı üzrə qəza-xilasetmə əməliyyatları həyata keçirilib.
FHN-in mətbuat xidmətindən bildirilib ki, görülmüş təcili və təxirəsalınmaz tədbirlər nəticəsində yanğınların operativ söndürülməsi, insanların həyatının xilas olunması təmin edilib.
Ümumilikdə, nazirliyin qüvvələri tərəfindən ötən sutka ərzində biri azyaşlı olmaqla, 5 nəfər xilas edilib.
ELM VƏ TƏHSİL
Kolleclərdə oxuyanlar daha çox hansı ixtisasları seçiblər? – statistika
2023-2024-cü tədris ilində ölkəmizdə fəaliyyət göstərən 59 dövlət və qeyri-dövlət orta ixtisas təhsili müəssisəsində (kollec) 65 min 640 tələbə oxuyub. Onların 59 min 314-ü əyani, 6326-sı qiyabi təhsil alıb. 2005-ci ildə isə orta ixtisas təhsili müəssisələrində təhsil alanların sayı 57 min 896, ötən il isə 64 min 623 nəfər olub. Bu, illər keçdikcə kolleclərdə oxuyan tələbələrin sayının artdığını göstərir.
Bu məlumat Dövlət Statistika Komitəsinin “Azərbaycanda təhsil, elm və mədəniyyət-2024” məcmuəsində əks olunub.
Məcmuədə bildirilir ki, ölkəmizin orta ixtisas təhsil müəssisələrində tələbələr daha çox texniki və texnoloji ixtisaslara (18 min 517 nəfər) üstünlük veriblər. İkinci yerdə səhiyyə, rifah və xidmət ixtisas qrupları (14 min 378), üçüncü yerdə iqtisadiyyat və idarəetmə ixtisasları qrupu (11 min 524) gəlir. Humanitar və sosial ixtisaslar qrupunu isə 2051 nəfər seçib.