Fransanın paytaxtı Parisdə Qarabağın işğaldan azad olunmasına həsr edilmiş konsert keçirilib.

“Muğam – sülhün səsi” muğam – jazz konsertində Azərbaycan Respublikasının Fransadakı səfiri Leyla Abdullayeva, diplomatlar, yerli siyasətçilər, iş adamları, elm xadimləri, jurnalistlər və digər şəxslər iştirak ediblər.

Tədbirdə çıxış edən L.Abdullayeva Ermənistanın hərbi təcavüzü nəticəsində Azərbaycanın 30 ilə yaxın işğal altında qalmış tarixi torpaqlarının 2020-ci ildə 44 günlük Vətən Müharibəsində işğaldan azad olunduğunu diqqətə çatdırıb. O, tarixi torpaqlarımızın azad edilməsinin Azərbaycan xalqı üçün böyük rəmzi məna daşıdığını, ədalətin bərpa olunması sevinci yaratdığını bildirib.

Səfir konsertin sülhə həsr edildiyini, torpaqlarının işğalı ilə əlaqədar iki dəfə müharibə aparmağa məcbur olmuş Azərbaycanın sülhə verdiyi əhəmiyyət, davamlı sülh naminə göstərdiyi səylərə də toxunub.

Səfir həmçinin qonaqlara xalqımızın bədii yaradıcılığının zəngin hissəsi, unikal sənət nümunəsi muğam, Azərbaycanda jazz musiqi janrının inkişafı, Şərq aləmində ilk olan opera haqqında məlumat verib.

Konsertdə Azərbaycan muğamının və jazzın sintezini Etibar Əsədli və muğam ifaçısı İlkin Dövlətov ifa ediblər. Onları zərb alətlərində Martin Vanqermee və kontrabasda Ranto Rakotomalala müşayiət ediblər.

Rusiya 12 milyon dollarlıq dələduzluqda ittiham olunan sabiq deputat Roman Qoldmanı “qırmızı xətt”lə axtarışa verib.

Bununla bağlı İnterpolun saytında məlumat yerləşdirilib.

Bildirilib ki, 48 yaşlı Roman Qoldman xüsusilə külli miqdarda dələduzluqda təqsirləndirilir.

Rusiya məhkəmələri tərəfindən Roman Qoldmanın barəsində qiyabi həbs qətimkan tədbiri seçilib və saxlanılaraq təhvil verilməsi üçün İnterpola müraciət edilib.

Qeyd edək ki, Roman Qoldman Krasnoyarsk parlamentinin keçmiş deputatı olub. O həmçinin “Goldman Group”un rəhbəridir.

Rusiya mediasındakı xəbərlərə əsasən yerli məhkəmələr tərəfindən şirkətə məxsus 383 obyekt, o cümlədən Qoldmanın özünə məxsus əmlak da daxil olmaqla, 828 milyon rubl müsadirə edilib.

İranın ən böyük mühafizəkar siyasi hərəkatlarından biri olan İslam İnqilabı Qüvvələrinin Koalisiya Şurası və daha əvvəl namizədliklərini geri götürmüş vitse-prezident Əmirhüseyn Qazizadə Haşimi ilə Tehran meri Əlirza Zəkani seçkilərin ikinci turunda onların həmfikirləri – İranın dini liderinin respublikanın milli təhlükəsizlik üzrə Ali Şurasındakı nümayəndəsi, mühafizəkarlar qanadına mənsub Səid Cəlili üçün səsverməyə çağırıblar.

“Report” xarici mətbuata istinadən xəbər verir ki, Cəlilinin namizədliyini “İslam İnqilabının İzləyiciləri Şəbəkəsi” mühafizəkar hərəkatı da dəstəkləyib.

İranda prezident seçkilərinin birinci turunda üçüncü yeri tutan və yarışdan kənarda qalan İran parlamentinin sədri Məhəmməd Baqer Qalibaf birinci turun rəsmi nəticələrinin açıqlanmasından bir saat sonra ikinci turda Cəliliyə səs verməyə çağırıb.

İslam İnqilabı Qüvvələrinin Koalisiya Şurası mühafizəkar namizədi açıq şəkildə dəstəklədiklərinə görə Qalibaf, Qazizadə Haşimi və Zəkaniyə təşəkkür edib.

Qeyd edək ki, İranda keçirilən seçkidə prezidentliyə namizədlərdən heç biri 50 faizdən çox səs toplaya bilmədiyindən ikinci tur təyin olunub. Məlumata görə, prezident seçkilərinin ikinci turu iyulun 5-nə təyin olunub.