Kişi həndbolçular arasında Azərbaycan Kubokunda finalçılar müəyyənləşib.

Azərbaycan Həndbol Federasiyasından verilən məlumata görə, yarımfinalda “Azəryol” komandası “Dinamo” ilə, “Bakı” isə “Qarabağ”la üz-üzə gəlib.

“AHF Arena”da keçirilən görüşlərdə “Azəryol” “Dinamo” üzərində 45:28 hesablı qələbə qazanıb. “Bakı” isə “Qarabağ”ı məğlub edib – 34:28.

Beləliklə, finalda “Bakı” və “Azəryol” komandaları qarşılaşacaq. Həlledici oyun mayın 30-da keçiriləcək.

Müstəqillik Günündə Gənclər və İdman Nazirliyi Laçın şəhərində “Sağlam həyat” günlərinə start verib.

Nazirlikdən verilən məlumata görə, Laçın bulvarında təşkil edilən tədbirə müxtəlif yaş qruplarından olan iştirakçılar qoşularaq qaçış, yerindən uzunluğa tullanma, top atma, ağırlıqqaldırma, turnik, paralel qollar, dayaqlı vəziyyətdən qolların bükülüb-açılması və qarın əzələlərinin möhkəmləndirilməsi (“jim” və “press”) normativlərini yerinə yetirirlər.

Normativləri yerinə yetirən bütün iştirakçılara sertifikatlar təqdim olunur.

Qeyd edək ki, “Sağlam həyat” günləri layihəsi ilk dəfədir ki, işğaldan azad edilmiş və əhalinin məskunlaşdığı bölgələrdə təşkil olunur.

Slovakiyanın paytaxtı Bratislavada yeniyetmə və gənclər arasında keçirilən kayak və kanoe üzrə 37-ci beynəlxalq “Bratislava Reqatası”nda Azərbaycan idmançısı bürünc medal qazanıb.

Bu barədə Azərbaycan Kanoe və Avarçəkmə Federasiyasından məlumat verilib.

İdmançılarımızdan Paşa Əsgərov 5000 metr məsafəyə kanoe qayığında finiş xəttinə üçüncü çatıb.

Amil Ramazanov 200 metr məsafəyə kayak yürüşlərdə uğurlu çıxış edərək A finalına yüksəlib. Lain o, yekun nəticədə ümumi yarış iştirakçıları arasında 8-ci sırada qərarlaşıb.

Qeyd edək ki, ümumilikdə komandamız reqatada 6 nəfərlik heyətlə təmsil olunub.