İDMAN

Azərbaycanın 9 boksçusu Dünya Olimpiya Təsnifat Turnirində mübarizə aparacaq

Martın 3-də İtaliyanın Busto Arsizio şəhərində boks üzrə I Dünya Olimpiya Təsnifat Turniri start götürəcək.

Azərbaycan Boks Federasiyasından verilən məlumata görə, 9 gün davam edəcək yarışda milli komanda 9 idmançı ilə təmsil olunacaq.

Yığmanın heyətində Nicat Hüseynov (51 kq), Ümid Rüstəmov (57 kq), Tayfur Əliyev (63,5 kq), Sərxan Əliyev (71 kq), Alfonso Dominqes (92 kq), Marjona Savriyeva (50 kq), Zeynəb Rəhimova (54 kq), Məhsəti Həmzəyeva-Ağamalıyeva (57 kq) və Şəhla Abdullayeva (66 kq) yer alacaq.

Turnirdə 114 ölkədən 632 (399 kişi, 233 qadın) boksçunun iştirakı gözlənilir. Yarışda kişi idmançıların mübarizəsində 28, qadınlarda 21 nəfər Paris-2024 Yay Olimpiya Oyunlarına lisenziya əldə edəcək.

Reqlamentə əsasən, bütün çəki dərəcələrində yarımfinalçılar Fransa paytaxtında iştirak hüququna yiyələnəcəklər. Yalnız qadınlarda 57 kq-da finalçılar və 60 kq-da ilk 3 yer Olimpiya lisenziyasına sahib olacaq.

Kişilərdən ibarət Azərbaycan millisi artıq fevralın 22-dən İtaliyada təlim-məşq toplanışındadır, qadın boksçularımız isə Busto Arsizioya sabah yollanacaqlar.

Qeyd edək ki, yığmamızın heyətində artıq Murad Allahverdiyev (80 kq) və Məhəmməd Abdullayev (+92 kq) Paris-2024-ə lisenziya qazanıblar.

Oxşar xəbərlər:

Up Next

DYP səhhətində ciddi problemlər olan sürücülərə müraciət edib

Don't Miss

Ermənilərin təxribatı ilə törədilmiş Sumqayıt hadisələrindən 36 il ötür

Burada şərh yaz

İDMAN

ABŞ-nin 14 güləş mütəxəssisi Azərbaycanda səfərdədir

ABŞ səfirliyinin təşəbbüsüylə bu ölkədən qadın güləşi üzrə 14 mütəxəssis Azərbaycanda səfərdədir.

Azərbaycan Güləş Federasiyasının (AGF) mətbuat xidmətindən verilən məlumata görə, mayın 25-dək davam edəcək səfər çərçivəsində qonaqlar “Qız kimi güləş” şüarı altında ölkəmizin müxtəlif idman zallarında olacaq, idmançılara “ustad dərsi” keçməklə yanaşı, yerli məşqçilərlə fikir mübadiləsi aparacaqlar.

Dünən bu məqsədlə nümayəndə heyəti AGF-nin təlim-məşq bazasında olub. Qadın güləşi üzrə millinin məşqçilər heyəti və güləşçilərlə görüşən qonaqlar komandanın məşq prosesində yaxından iştirak ediblər. Sonda xatirə şəkli çəkdirilib və federasiya tərəfindən amerikalı məşqçilərə hədiyyələr təqdim edilib.

Qeyd edək ki, nümayəndə heyəti səfər çərçivəsində Göygöl, Lənkəran və Masallıda yerləşən olimpiya idman komplekslərində də analoji tədbirdə iştirak edəcək. Səfərin məqsədi ölkəmizdə qadın güləşinin inkişafına və təbliğatına dəstək verməkdir.

Davamına bax

İDMAN

Rövşən Nəcəf UEFA prezidenti ilə görüşüb

AFFA prezidenti Rövşən Nəcəf UEFA rəhbəri Aleksander Çeferinlə görüşüb.

Toplantı Tailandın paytaxtı Banqkokda keçirilən FIFA-nın 74-cü Konqresindən əvvəl baş tutub.

Görüşdə UEFA və AFFA arasında qarşılıqlı əməkdaşlıq məsələləri müzakirə olunub, UEFA-nın dəstəyi ilə ölkəmizdə həyata keçirilmiş layihələr barədə fikir mübadiləsi aparılıb.

Tərəflər səmərəli və faydalı əməkdaşlığın gələcəkdə də davam etdiriləcəyinə əminliyini ifadə ediblər.

Davamına bax

İDMAN

Sərbəst güləş üzrə Azərbaycanın U-15 millisi Avropa çempionatının qalibi olub

Sərbəst güləş üzrə Azərbaycanın U-15 millisi Yunanıstanın Lutraki şəhərində keçirilən Avropa çempionatının qalibi olub.

Azərbaycan Güləş Federasiyasının (AGF) mətbuat xidmətindən verilən məlumata görə, böyük məşqçi Namiq Quliyev, məşqçilər Elşad Allahverdiyevlə Xəqan Süleymanovun rəhbərliyi altında qitə birinciliyinə tam heyətlə yollanan yığmamız 1 qızıl, 3 gümüş və 4 bürünc medal qazanıb.

İbrahim Həsənov (41 kq) bütün rəqiblərinə qalib gələrək fəxri kürsünün ən yüksək pilləsinə qalxıb. Rəşid Nazarov (52 kq), Ruslan Vəliyev (62 kq) və Nihad Süleymanlı (75 kq) ikinci, Musa Tağıyev (38 kq), Abbas Şəfiyev (44 kq), Ramal Məmmədoğlu (52 kq) və Asim Əliyev (57 kq) üçüncü yeri tutub.

Yekunda 140 xal toplayan millimiz ən yaxın izləyicisini 31 xal qabaqlayaraq komanda hesabında Avropa çempionu olub. Beləliklə, U-15 Avropa çempionatları tarixində ilk dəfə sərbəst güləş üzrə millimiz komanda hesabında 1-ci yeri tutub. Gürcüstan (109) ikinci, Türkiyə (104) isə üçüncü yerdə qərarlaşıb.