SİYASƏT
Ermənistanın təxribatları dünya mətbuatının manşetlərində
Ermənistan silahlı qüvvələrinin sentyabrın 12-də gecə saatlarında irimiqyaslı təxribata əl atması, son bir neçə gün ərzində Azərbaycanın sərhəd rayonlarını intensiv atəşə tutması, Azərbaycan Ordusunun hərbçiləri ilə yanaşı, Laçın və Kəlbəcər rayonlarında quruculuq işlərinə cəlb olunmuş mülki şəxsləri də hədəfə alması dünya mediasının diqqət mərkəzindədir. Xarici mətbuat orqanlarında Ermənistanın İkinci Qarabağ müharibəsindən sonra imzalanmış üçtərəfli Bəyanatda üzərinə götürdüyü öhdəlikləri yerinə yetirməməsinə toxunulur, hələ də Qarabağ ərazisindən erməni silahlılarını çıxarmaması barədə məlumat verilir.
Türkiyə mətbuatı ermənilərin təxribatları haqqında genişhəcmli material verməkdə davam edir. Media Ermənistan silahlı qüvvələrinin dövlət sərhədində törətdiyi genişmiqyaslı təxribatları pisləyir. Bildirilir ki, Ermənistan silahlı qüvvələri tərəfindən Azərbaycanın dövlət sərhədində təxribatlar törədilir, Azərbaycan Ordusunun hərbi qulluqçuları şəhid olur və infrastruktura zərbə vurulur, dağıntılar törədilir. Ermənistan illərdir davam edən təxribatçı və təcavüzkar mövqeyindən tamamilə əl çəkməli, ona uzadılan sülh əlini fürsət bilməlidir. Qeyd olunub ki, Ermənistanın davam edən hərbi avantüra və revanşizm siyasəti, son bir ay ərzində Kəlbəcər, Laçın, Daşkəsən və Gədəbəy istiqamətlərində Azərbaycan Ordusunun mövqelərini intensiv atəşə tutması və bu gün törətdiyi genişmiqyaslı təxribatları vəziyyətin gərginləşməsinin əsas səbəbidir.
Norveçin bir sıra mətbuat orqanları baş verən hadisələrə cavab olaraq beynəlxalq səviyyədə lazımi addımların atılmasını, ermənilərin yeni provokasiyalarının qarşısının alınmasına ümid edir. Mətbuat Azərbaycan vətəndaşlarının təhlükəsizliyinin qorunması və Ermənistan tərəfinin üzərinə götürdüyü ikitərəfli və çoxtərəfli öhdəliklərə uyğun addımlar atmasını zəruri hesab edir.
Misirin “Alqararalarabi”, “Rayetmisr”, “Əl Diplomasi”, “Cümhuriyyə” kimi qəzet və portallarında sentyabrın 12-də gecə saatlarından başlayaraq, Ermənistan silahlı qüvvələrinin bölmələrinin dövlət sərhədinin Daşkəsən, Kəlbəcər və Laçın istiqamətlərində genişmiqyaslı təxribat törətdiyi qeyd olunub. Materiallarda erməni silahlı birləşmələri tərəfindən Azərbaycan Ordusunun Daşkəsən, Kəlbəcər və Laçın rayonları ərazisindəki mövqeləri müxtəlif çaplı silahlar, o cümlədən, minaatanlardan intensiv atəşə tutulduğu və nəticədə Azərbaycan Silahlı Qüvvələrinin şəxsi heyəti arasında itkilərin olduğu, hərbi infrastruktura ziyan dəydiyi bildirilib.
Ermənistan silahlı qüvvələrinin Azərbaycan–Ermənistan dövlət sərhədinin Daşkəsən, Kəlbəcər və Laçın istiqamətlərində törətdikləri təxribatlar Əlcəzair mətbuatının da diqqətindədir. Əlcəzair mediasında Azərbaycan Ordusunun, guya Ermənistanın mülki əhalisini, obyektlərini və infrastrukturunu hədəfə alması barədə yayılan məlumatların həqiqəti əks etdirmədiyini və Ermənistan tərəfinin yaydığı növbəti dezinformasiya olduğunu bildirir.
Yaponiyanın nüfuzlu JIJI PRESS agentliyinin, “The Sankei News” qəzetinin, “almedia.jp” portalının və digər KİV-ində yapon və ingilis dillərində yaydığı məlumatlarda erməni təxribatlarının vəziyyətin gərginləşməsinə xidmət etdiyi vurğulanır. Məlumatlarda Ermənistan silahlı qüvvələrinin törətdiyi təxribatlara Azərbaycan Ordusunun layiqli cavab verdiyi də bildirilir.
Ukrayna mətbuatı Ermənistan silahlı qüvvələrinin bölmələrinin təxribatları barədə geniş informasiyalar yaymaqda davam edir. Ölkənin xəbər portallarında baş vermiş təxribat, qarşıdurma geniş işıqlandırılıb, Azərbaycanın haqlı mövqeyi əks olunub. Ukrayna mətbuatında qeyd olunur ki, Ermənistan silahlı qüvvələrinin törətdiyi təxribatlara Azərbaycan Ordusu layiqli cavab verib.
Moldova mətbuatı Ermənistanın davam edən hərbi avantüra və revanşizm siyasəti, son bir ay ərzində Kəlbəcər, Laçın, Daşkəsən və Gədəbəy istiqamətlərində Azərbaycan Ordusunun mövqelərini intensiv atəşə tutması və bu gün törətdiyi genişmiqyaslı təxribatları vəziyyətin gərginləşməsi barədə geniş materiallar dərc edib.
Böyük Britaniya mətbuatında da Ermənistan silahlı qüvvələrinin təxribatının, eləcə də Azərbaycanın ərazisinə və suverenliyinə qarşı hərbi təhdidlərin qarşısının alınması, ərazilərdə infrastruktur işlərinə cəlb olunmuş hərbi qulluqçuların, mülki əhalinin təhlükəsizliyinin təmin edilməsi məqsədilə Kəlbəcər və Laçın rayonları üzrə Azərbaycan Ordusunun bu istiqamətdə dislokasiya olunmuş bölmələri tərəfindən qəti cavab tədbirləri görüldüyü barədə məlumatlar verilib.
İngilis jurnalisti Neyl Vatson ermənilərin genişmiqyaslı təxribat törətməsinə münasibət bildirərkən qeyd edib ki, hazırda sərhəddə baş verən təxribatların əsas səbəbi Paşinyan hökumətinin yürütdüyü yarıtmaz siyasətdir: “Paşinyan Ermənistan tarixində Qarabağı itirən rəhbər kimi qalmaqdan qorxur. Əvvəlki hakimiyyətləri dəstəkləyən ermənilər və erməni diasporu Paşinyan əleyhinə birgə mübarizə aparırlar”. N. Vatson bəzi xarici qüvvələrin Ermənistanın baş naziri Nikol Paşinyan və Azərbaycan Prezidenti İlham Əliyev arasında keçirilən görüşlərə Avropa İttifaqının vasitəçilik etməsindən qəzəbləndiyinə də toxunub.
Gürcüstanın xəbər portallarında yayılan materiallarda Ermənistan silahlı qüvvələrinin genişmiqyaslı təxribat törətməsi və Azərbaycan Ordusu tərəfindən layiqli cavab verilməsi qeyd olunub.
İtaliyanın aparıcı kütləvi informasiya vasitələri Azərbaycan–Ermənistan sərhədindəki hərbi toqquşmalardan yazıb. Verilmiş informasiyalarda Ermənistan silahlı qüvvələrinin diversiya qruplarının Azərbaycan Ordusunun bölmələrinin mövqeləri arasındakı ərazilərinin və təminat yollarının minalanmasını həyata keçirdiyi, nəticədə silahlı toqquşmanın baş verdiyi, hər iki tərəfdə də itkilərin olduğu qeyd edilib.
Rizvan FİKRƏTOĞLU,
“Xalq qəzeti”
Digər xəbərlərə də bax
SİYASƏT
Azərbaycanın Malayziyadakı səfiri Saravak ştatının Baş naziri ilə görüşüb
Azərbaycanın Malayziyadakı səfiri İrfan Davudov Cənub-Şərqi Asiya ölkəsinin Saravak ştatında işgüzar səfər çərçivəsində regionun baş naziri və bir sıra yüksəkvəzifəli şəxslərlə görüşüb.
Bu barədə Azərbaycanın diplomatik missiyasının mətbuat xidməti bildirib.
“Səfir İrfan Davudov Malayziyanın Saravak ştatında işgüzar səfərdə olub. Səfər çərçivəsində səfir Saravak Ştatının Baş naziri, həmçinin Saravak Ştat Qanunvericilik Assambleyasının sədri və sədr müavini və Saravakın paytaxtı Kuçinq şəhərinin meri ilə görüşlər keçirib”, – səfirlik diqqətə çatdırıb.
Əlavə edilib ki, diplomat həmçinin Saravak ştatına səfəri çərçivəsində həmçinin Saravak Ticarət və Sənaye Palatasının prezidenti Dato Şri Abanq Hacı Abdul Kərim Bin Tun Datuk Abanq Haci Openq, eləcə də Malayziya Saravak Universitetinin prorektoru professor Dr. Əhməd Hata Rasit ilə görüşüb.
SİYASƏT
Yaşar Əliyev Nauru Prezidentinə ünvanlanmış COP29-a dəvət məktubunu həmkarına təqdim edib
Azərbaycanın BMT yanındakı daimi nümayəndəsi Yaşar Əliyev Nauru Prezidenti Devid Adanqa ünvanlanmış COP29-a dəvət məktubunun əslini dünya təşkilatındakı həmkarı Marqo Deiyeyə təqdim edib.
Bu barədə Naurunun BMT-dəki diplomatik missiyasının mətbuat xidməti bildirib.
“Azərbaycanın səfiri Nauru Prezidenti Zati-alilərinə ünvanlanmış dəvət məktubunun əslini rəsmi şəkildə təqdim etmək üçün səfir Deiyeyə baş çəkib. Bu, Azərbaycanda, Bakıda keçiriləcək COP29-da iştirak dəvətidir. Azərbaycanın prezidentliyi ilə keçiriləcək COP29-u səbirsizliklə gözləyirik”, – o qeyd edib.
Xatırladaq ki, daha əvvəl Azərbaycanın BMT-dəki nümayəndəsi türkiyəli həmkarı Ahmet Yıldızla “ikitərəfli və çoxtərəfli əməkdaşlığımızın dərinləşdirilməsi yollarını” müzakirə etmişdilər.
MANŞET
Hikmət Hacıyev ABŞ-də səfərdədir, dövlət katibinin müavini ilə görüşüb
Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev ABŞ-də səfərdədir.
Prezidentin köməkçisi səfər çərçivəsində ABŞ dövlət katibinin siyasi məsələlər üzrə müavini Con Bass, dövlət katibinin Avropa və Avrasiya məsələləri üzrə köməkçisinin birinci müavini Yuri Kim və dövlət katibinin demokratiya, əmək və insan hüquqları üzrə köməkçisi Robert Cilkristlə görüşüb.
Bildirilib ki, görüşlərdə ikitərəfli münasibətlər, mövcud regional və qlobal təhlükəsizlik mühiti, habelə Azərbaycanla Ermənistan arasında münasibətlərin normallaşması prosesini əhatə edən geniş spektrli məsələlər müzakirə olunub.