Bu ilin may ayından etibarən 14 ali təhsil müəssisəsində ibtidai sinif müəllimliyi ixtisasının proqram akkreditasiyasının həyata keçirilməsinə başlanılıb.

Təhsildə Keyfiyyət Təminatı Agentliyindən bildirilib ki, artıq üç ali təhsil müəssisəsinə – Azərbaycan Dövlət Pedaqoji Universitetinin Şamaxı filialı, Naxçıvan Müəllimlər Universiteti və Gəncə Dövlət Universitetinə baxış məqsədi ilə səfərlər təşkil edilib.

Qeyd olunub ki, digər 11 ali təhsil müəssisəsində də bu proses mərhələli şəkildə baş tutacaq. Baxışı yekunlaşan ali təhsil müəssisələri üçün proses yekun hesabatın yazılması mərhələsindədir. Yekun hesabat Akkreditasiya şurasına çıxarıldıqdan sonra ictimaiyyətə proqram akkreditasiyası ilə bağlı qərar barədə məlumat veriləcək. Növbəti mərhələdə hansı proqramların əhatə olunacağı ilə bağlı məlumat proseslərə başlanılmazdan öncə ictimaiyyətlə bölüşüləcək.

Proqram akkreditasiyasının keçirildiyi ali təhsil müəssisələri aşağıdakılardır:

– Azərbaycan Dövlət Pedaqoji Universiteti

– Azərbaycan Dövlət Pedaqoji Universitetinin Şəki filialı

– Azərbaycan Dövlət Pedaqoji Universitetinin Cəlilabad filialı

– Azərbaycan Dövlət Pedaqoji Universitetinin Ağcabədi filialı

– Azərbaycan Dövlət Pedaqoji Universitetinin Quba filialı

– Azərbaycan Dillər Universiteti

– Bakı Qızlar Universiteti

– Bakı Slavyan Universiteti

– Lənkəran Dövlət Universiteti

– Mingəçevir Dövlət Universiteti

– Xəzər Universiteti

Azərbaycan boksçuları mayın 24-də Tailandın paytaxtı Banqkokda start götürəcək II Dünya Olimpiya Təsnifat turnirində iştirak edəcəklər.

Azərbaycan Boks Federasiyasının mətbuat xidmətindən verilən məlumata görə, yığmamız 10 gün davam edəcək yarışda 9 boksçu ilə təmsil olunacaq.

Komandamızın heyətində Olimpiya lisenziyası uğrunda Şamil Əsgərov (57 kq), Malik Həsənov (63,5 kq), Sərxan Əliyev (71 kq), Alfonso Dominqes (92 kq), Marjona Savriyeva (50 kq), Zeynəb Rəhimova (54 kq), Məhsəti Həmzəyeva (57 kq), Şəhla Allahverdiyeva (66 kq) və Aynur Rzayeva (75 kq) mübarizə aparacaqlar.

Turnirdə 133 ölkə və Qaçqınlar komandasından 600-dən çox boksçunun iştirakı gözlənilir. Kişilərin mübarizəsində 28, qadınlarda 23 nəfər Paris-2024 Yay Olimpiya Oyunlarına lisenziya əldə edəcək.

Reqlamentə əsasən, boksçularımızın mübarizə aparacağı 57 kq-da 3 (kişilər), 63,5 və 71 kq-da 5, digər çəkilərdə 4 idmançı Fransa paytaxtında iştirak hüququna yiyələnəcək.

Qeyd edək ki, yığmamızın heyətində artıq Nicat Hüseynov (51 kq), Murad Allahverdiyev (80 kq) və Məhəmməd Abdullayev (+92 kq) Paris-2024-ə lisenziya qazanıblar.

Daxili İşlər Nazirliyi (DİN) azad olunan bölgələrdə çalışan şəxsləri tapdıqları silahları-sursatları polisə təhvil verməyə çağırıb.

Bu barədə DİN-in Mətbuat Xidməti məlumat yayıb.

Bildirilib ki, bölgədə abadlıq, tikinti, quruculuq işlərinə cəlb edilən şəxslərdən xahiş edirik ki, silah-sursat, partlayıcı maddələrə, şübhəli əşyalara rast gəldikdə, aşkarladıqda DİN-in 102 Zəng Mərkəzinə, yaxud ərazidə xidmət aparan polis əməkdaşlarına məlumat versinlər.

Hərbi təyinatlı əşyalara mülki şəxslərin toxunması həyat və sağlamlığa təhlükə yaratmaqla yanaşı, həmin əşyaları götürmək, daşımaq, saxlamaq, başqasına vermək cinayət məsuliyyətinə səbəb olur.

“Qeyd olunanları nəzərə alaraq, bir daha bölgədə çalışan şəxsləri ictimai təhlükəsizlik qaydalarına ciddi əməl etməyə çağırırıq”, – deyə məlumatda vurğulanıb.