Balakən Olimpiya İdman Kompleksində Daxili İşlər Nazirliyinin İdman Cəmiyyətinin, Gənclər və İdman Nazirliyinin birgə təşkilatçılığı ilə gənclər arasında “Sağlam bədəndə sağlam ruh” devizi altında idmanın kross qaçışı və turnikdə dartınma növləri üzrə respublika yarışlarının rayon mərhələsi keçirilib.
Bu barədə ShekiMedia.az-a Balakən Rayon Gənclər və İdman İdarəsindən məlumat verilib.
Bildirilib ki, yarışın keçirilməsində məqsəd gənclər arasında sağlam həyat tərzinin və idmanın təbliği, gənclərin Daxili İşlər Nazirliyi sistemində təhsilə və xidmətə təşviq edilməsi, onların daxili işlər orqanlarında, Daxili Qoşunlarda xidmətə həvəsləndirilməsindən ibarətdir.
Kütləvi idman tədbirində Balakən Rayon Polis Şöbəsinin rəisinin köməkçisi Elçin Musayev, rayon gənclər və idman idarəsinin rəisi Rasim Paçalov, Daxili İşlər Nazirliyinin İdman Cəmiyyətinin əməkdaşı Zaur Məcidov, idman ictimaiyyətinin nümayəndələri və digər qonaqlar iştirak ediblər.
Əvvəlcə torpaqlarımızın ərazi bütövlüyü uğrunda mübarizədə canlarından keçən şəhidlərin xatirəsi bir dəqiqəlik sükutla yad edilib.
Tədbirdə çıxış edənlər dövlətimizin başçısı tərəfindən idmanın inkişafına göstərilən diqqət və qayğıdan danışıb, yarış iştirakçılarına uğurlar arzulayıblar. Bildirilib ki, bu cür idman tədbirlərinin gənclərin milli vətənpərvərlik ruhunda tərbiyə edilməsində böyük rolu var.
Dövlət Himni səsləndirildikdən sonra tədbir açıq elan olunub. Yeniyetmə və gənc idmançıların nümunəvi çıxışlarından sonra yarışa qatılan 20-25 yaş arasında 50-dən çox gənc turnikdə dartınma və müəyyən olunmuş marşrut üzrə 3 min metr məsafəyə kross qaçışında yarışıblar.
Yarışın sonunda hər bir hərəkət üzrə ilk üç yeri tutmuş idmançılara Daxili İşlər Nazirliyinin İdman Cəmiyyəti tərəfindən diplom, medal və qiymətli hədiyyələr təqdim olunub.