BALAKƏN
Balakən rayonunda narkomaniyaya qarşı mübarizə ilə bağlı tamaşa nümayiş olunub – FOTOLAR
Dekabrın 2-də Balakən rayon Mədəniyyət Mərkəzi və Şəki – Zaqatala təhsil idarəsinin Balakən rayon sektorunun birgə təşkilatçılığı ilə Pakizə Hüseynova və Mirzəağa Məmmədovun ssenarisi əsasında səhnələşdirilmiş “Külə dönmüş arzular” adlı tamaşa nümayiş olunub.
Bu barədə ShekiMedia.az-a Şəki Regional Mədəniyyət İdarəsindən məlumat verilib.
Mədəniyyət Mərkəzinin əməkdaşı Bakeyeva Zöhrənin quruluş verdiyi tamaşada rayon mədəniyyət işçiləri, Mədəniyyət Mərkəzinin könüllüləri, A.Novruzov adına Balakən rayon Humanitar və Texniki təmayüllü liseyin şagirdləri çıxış ediblər.
Tamaşadan əvvəl Şəki Regional Mədəniyyyət İdarəsinin Balakən rayon üzrə nümayəndəsi- baş məsləhətçi Şəfəq Hacıyeva çıxış edərək qeyd edib ki, bu gün əsrin bəlasına çevrilmiş narkomaniyaya qarşı mübarizə, milli dəyərlərimizə, adət-ənənələrimizə sahib çıxan, geniş dünyagörüşlü, təhsilli və intelektli gənc nəslin yetişdirilməsi dövlətimiz üçün prioritet vəzifələrdəndir. O, ölkə başçısının müvafiq Sərəncamları və Dövlət Proqramına uyğun olaraq rayonumuzda fəaliyyyət göstərən mədəniyyət müəssisələrində görülən işlər barədə məlumat verərək gəncləri ayıq-sayıq olmağa, bəşəriyyəti ağuşuna almış bu dəhşətli bəlaya qarşı mübarizədə yaşından asılı olmayaraq hər kəsin vətəndaşlıq mövqeyi sərgiləməsinin vacib olduğunu vurğuladyıb.
Daha sonra Balakən rayon Polis Şöbəsinin Yetkinlik Yaşına Çatmayanlarla Proflaktik İşin Təşkili Qrupunun inspektoru polis kapitanı Sahil Babayev çıxış edərək diqqətə çatdırıb ki, bu gün yeniyetmə və gənclərin milli ruhda tərbiyəsi, onların hərbi-vətənpərvərlik tərbiyəsinin gücləndirilməsi, sosial şəbəkələrdən təhlükəsiz istifadəsinə, sağlam həyat tərzinin təbliği diqqət mərkəzindədir.
Tədbirin sonunda Mədəniyyyət Mərkəzinin rəhbərliyi və MİHİ-nin Balakən rayon Komitəsi tərəfindən tamaşanın təşkilatçılarına və aktyorlarına diplom və müxtəlif hədiyyələr təqdim edilib.
Digər xəbərlərə də bax
BALAKƏN
Balakəndə kömür sexində yanğın baş verib
Balakən şəhərinin 28 May küçəsində ümumi sahəsi 1200 kvadratmetr olan kömür istehsalı sexində yanğın olub.
Hadisə gecə saat 3 radələrində baş verib.
Yanğının söndürülməsi üçün əraziyə Fövqəladə Hallar Nazirliyinin (FHN) Balakən rayon Dövlət Yanğından Mühafizə Hissəsinin iki yanğınsöndürən maşını və şəxsi heyəti cəlb edilib.
Hadisə nəticəsində sexin dam örtüyünün 100 kvadratmetrlik sahəsinin yanar konstruksiyaları yanıb.
Sexin qalan hissəsi, kömür istehsal edən dörd ədəd texniki avadanlıq və sexdə olan digər əşyalar yanğından mühafizə olunub.
Yanğın zamanı xəsarət alan olmayıb. Faktla bağlı araşdırma aparılır.
BALAKƏN
Balakəndə Novruz bayramı münasibətilə ümumrayon tədbiri keçirilib – FOTOLAR
Xalqımızın ən əziz bayramı olan Novruzun gəlişi münasibətilə martın 19-da rayon Mədəniyyət Mərkəzində təntənəli bayram tədbiri təşkil olunub. Ümumrayon şənliyində Balakən Rayon İcra Hakimiyyətinin, hüquq-mühafizə orqanlarının rəhbərləri, idarə və müəssisələrin kollektivləri, mədəniyyət işçiləri, şəhid ailələri və qazilər iştirak ediblər.
ShekiMedia.az xəbər verir ki, tədbir Mədəniyyət Mərkəzinin qarşısındakı tonqalın alovlandırılması ilə başlayıb. Daha sonra tədbir iştirakçıları mərkəzin foyesində Novruz atributlarından ibarət sərgi ilə tanış olublar.
Dədə Qorqud və Bahar qızı mərasim iştirakçılarını salamlayıb, onlara xoş arzularını çatdırıb. Tədbirdə çıxış edən rayon icra hakimiyyətinin başçısı İslam Rzayev bayram münasibətilə bütün balakənliləri təbrik edib, Novruzun müstəqillik dövründə daha coşqu və təmtəraqla qeyd olunduğunu diqqətə çatdırıb. Milli adət-ənənələrimizin özümüzə qaytarılmasında, milli bayramlarımızın dövlət səviyyəsində qeyd edilərək ümumxalq bayramı səviyyəsinə qaldırılmasında ümummilli lider Heydər Əliyevin, onun siyasi varisi Prezident İlham Əliyevin böyük xidmətlərinin olduğunu vurğulayıb. Rayon rəhbəri bildirib ki, son dörd ildə isə Novruz bayramının qeyd edilməsi xüsusi məna daşıyır. Artıq bu bayram şənliyi Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə müzəffər Azərbaycan Ordusu tərəfindən işğaldan azad edilmiş torpaqlarımızda da keçirilir.
Sonra rayon mədəniyyət işçilərinin ifasında bir-birini əvəz edən rəngarəng musiqi nömrələri, balacaların rəqsləri, ədəbi-bədii səhnəciklər iştirakçılarda unudulmaz təəssürat yaradıb.
BALAKƏN
Balakəndə “Əsgərə məktub” kampaniyası başladılıb
Balakən rayon təhsil sektorunun təşəbbüsü ilə “Əsgərə məktub” kampaniyası başladılıb.
ShekiMedia.az xəbər verir ki, kampaniyada 700-dən çox məktəbli, habelə təhsil işçiləri və şəhid ailələri iştirak edib.
Qeyd edək ki, kampaniya çərçivəsində yazılan məktublar işğaldan azad olunan ərazilərdə xidmət edən əsgərlərimizə çatdırılmaq üçün Gəncə Qarnizonu İdeoloji və Mədəniyyət Mərkəzinin əməkdaşlarına təhvil verilib.