MANŞET
Azərbaycanda ilk dəfə elektromobillərin yürüşü keçiriləcək
Ölkəmizdə ilk dəfə elektrik avtomobillərin yürüşü baş tutacaq.
Azərbaycan Respublikası Prezidentinin Sərəncamı ilə təsdiq edilmiş “Azərbaycan 2030: sosial-iqtisadi inkişafa dair Milli Prioritetlər” proqramında təmiz ətraf mühitə nail olmaq və “yaşıl artım” ölkəsinə çevrilmək kimi hədəflər təyin edilib.
Bu proqram çərçivəsində Azərbaycan avtomobil dilerləri assosiasiyası (AADA) artıq bir sıra tədbirlər həyata keçirilib. Bunlardan Bakı-Mingəçevir marşrutu ilə “Yaşıl ölkə 2022” ekoloji avtomobillər yürüşü, “Avto Eko 2023” elektrik avtomobillər sərgisini misal gətirmək olar.
3 iyun tarixində baş tutacaq yürüş ümummilli lider Heydər Əliyevin 100 illiyinə həsr olunur. Bakı-Qobustan marşrutu ilə hərəkət edəcək ekoloji avto-karvan ən yeni elektromobillərdən ibarət olacaq. AADA idarə heyətinin sədri Natiq Zərbəliyev mətbuata açıqlama verib.
“Aksiyanın məqsədi Ulu Öndər Heydər Əliyevin xatirəsinin yad edilməsi, Heydər Əliyev irsinin təşviqi, eyni zamanda dövlət əhəmiyyətli tarixi-bədii qoruqlara, ətraf mühitin qorunmasına, gənclərin vətənpərvərlik ruhunda tərbiyyəsinə tövhə verməkdir. Təsadüfi deyil ki, yürüşün final mərhələsində məktəblilər arasında elan etdiyimiz «Gələcəyin ekoloji avtomobili» mövzusunda «onlayn» rəsm müsabiqəsinin qalibləri mükafatlandırılacaq. Qaliblərin adlarının məhz 1 iyun Uşaqların Beynəlxq Müdafiəsi Günündə açıqlanması da əlbəttə təsadüf deyil. Tanınmış avto-dizayner Samir Sadıxovun rəhbərlik etdiyi münsiflər heyətinin qərarı ilə ilk yerlərə Gülay Məmmədova, Nuran Nuri və Əli Mürsalov layiq bilinmişlər. Daha üç həvəsləndirici mükafat Nabat Əhmədova, Sədaqət Şirəliyeva və qardaş Türkiyədən öz rəsmini göndərmiş Handan Aydoğana təqdim olunacaq.
Ulu Öndər Heydər Əliyevin 100 illiyinin Azərbaycan ərazisində mövcud olan ən qədim insan məskənində qeyd edilməsi və eyni tədbirdə gələcəyi təsvir edən istedadlı uşaqların müvafiq diplom və mükafatlarla təltif olunması zənnimcə son dərəcə simvolik məna daşıyacaq.
“Son olaraq bu layihədə bizə təşkilati dəstək göstərmiş Ekologiya və Təbii Sərvətlər Nazirliyinə, Mədəniyyət Nazirliyinə, Azərbaycan Avtomobil Federasiyasına və eləcə də AADA-nın daimi tərəfdaşları “Mashin.Al” “onlayn” avtomobil mərkəzi və elektromobillər üçün “şarj” avadanlığı idxal edən “MLK Tech Group”a təşəkkür edirəm”, – deyə N.Zərbəliyev qeyd edib.
Digər xəbərlərə də bax
MANŞET
Azərbaycan Ordusunun təlim zamanı həlak olan əsgərinə şəhid statusu veriləcək
Təlim atış çalışmaları yerinə yetirilən zaman ona təhkim olunmuş odlu silahdan açılmış atəş nəticəsində ölən Müdafiə Nazirliyinin N saylı hərbi hissəsinin hərbi qulluqçusu, əsgər Xələfov Saleh Kamal oğluna şəhid statusu veriləcək.
Bunu “Report”un sorğusuna cavab olaraq Səfərbərlik və Hərbi Xidmətə Çağırış üzrə Dövlət Xidmətinin İctimaiyyətlə İş və Beynəlxalq Əlaqələr şöbəsinin rəisi Pərviz Sədrəddinov deyib.
O bildirib ki, şəhidlik statusunun verilməsi qərarı Səfərbərlik və Hərbi Xidmətə Çağırış üzrə Dövlət Xidmətinə həlak olanın xidmət keçdiyi hərbi hissə tərəfindən təqdim edilən müvafiq arayış əsasında verilir.
Qeyd edək ki, aprelin 5-də Müdafiə Nazirliyinin N saylı hərbi hissəsinin hərbi qulluqçusu, əsgər Xələfov Saleh Kamal oğlunun təlim atış çalışmaları yerinə yetirilən zaman ona təhkim olunmuş odlu silahdan açılmış atəş nəticəsində ölüb. Fakt üzrə Qubadlı hərbi Prokurorluğunda Azərbaycan Respublikası Cinayət Məcəlləsinin müvafiq maddəsi ilə cinayət işi başlanılıb. Hazırda istintaq davam etdirilir.
CƏMİYYƏT
Sabahın HAVA PROQNOZU – 07.04.2024
Aprelin 7-də Azərbaycanda hava şəraitinin bəzi yerlərdə yağıntılı olacağı gözlənilir.
Bu barədə ShekiMedia.az-a Milli Hidrometeorologiya Xidmətindən məlumat verilib.
Bildirilib ki, sabah Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin gecə və axşam bəzi yerlərdə yağış yağacağı ehtimalı var. Mülayim şimal-şərq küləyi əsəcək. Havanın temperaturu gecə 6-11° isti, gündüz 13-18° isti olacaq. Atmosfer təzyiqi normadan yüksək 765 mm civə sütunu olacaq. Nisbi rütubət 60-70 % olacaq.
Aprelin 7-də Azərbaycanın rayonlarında da bəzi yerlərdə havanın arabir yağıntılı olacağı gözlənilir. Ayrı-ayrı yerlərdə intensiv olacağı, şimşək çaxacağı, dolu düşəcəyi, dağlıq ərazilərdə qar yağacağı ehtimalı var. Bəzi yerlərdə arabir duman olacaq. Mülayim qərb küləyi əsəcək. Havanın temperaturu gecə 5-10° isti, gündüz 15-20° isti, dağlarda gecə 1° şaxtadan 3°-dək isti, gündüz 3-7° isti olacaq.
CƏMİYYƏT
Kəlbəcərdə zəlzələ olub
Kəlbəcər rayonunda zəlzələ qeydə alınıb.
Respublika Seysmoloji Xidmət Mərkəzindən verilən məlumata görə, zəlzələnin maqnitudası 3.2 olub.
Yeraltı təkanın dərinliyi 10 kilometrdir.