Ümummilli Lider Heydər Əliyevin anadan olmasının 101-ci ildönümü münasibətilə Azərbaycanın Bosniya və Herseqovinadakı səfirliyində tədbir keçirilib.

Səfirlikdən verilən məlumata görə, tədbir iştirakçıları tərəfindən əvvəlcə ulu öndər Heydər Əliyevin büstü önünə əklil və gül dəstələri qoyulub, xatirəsi ehtiramla anılıb.

Daha sonra Səfir Vilayət Quliyev çıxış edərək Heydər Əliyevin istər Sovet İttifaqı dövründə, istərsə də müstəqilliyimizi bərpa etdikdən sonra Azərbaycana rəhbərlik etdiyi zaman ölkədə sabitliyin, iqtisadi inkişafın, enerji strategiyasının əsasının qoyulduğunu və Azərbaycanın beynəlxalq aləmdəki mövqelərinin möhkəmləndiyini vurğulayıb.

Səfir Azərbaycan xalqının Ümummilli Lideri Heydər Əliyevin ölkənin davamlı inkişafı naminə əsasını qoyduğu bu siyasətin hazırda Prezident İlham Əliyev tərəfindən uğurla davam etdirildiyini tədbir iştirakçılarının diqqətinə çatdırıb.

Müasir Azərbaycan dövlətinin qurucusu kimi ölkənin əldə etdiyi bütün uğurlarda, torpaqların işğaldan azad edilməsində, Azərbaycanın yalnız regionda deyil, dünya miqyasında nüfuz və etibar qazanmağında Heydər Əliyev şəxsiyyəti və irsinin böyük rolu olduğunu qeyd edib.

Bu gün ARB (Azerbaijan Republic Broadcaster) ümumrespublika televiziya kanalının 10 yaşı tamam olur.

ARB televiziya şirkəti Milli Televiziya və Radio Şurasının 2014-cü ildə keçirdiyi tenderin nəticələrinə görə Azərbaycan üzrə yayım hüququ əldə edib.

ARB Azərbaycanda müstəqil regional telekanallar – “Kəpəz” TV (Gəncə), “ARB Şimal” (Xaçmaz), “ARB Cənub” (Lənkəran), EL TV (Yevlax), “Kanal-S” (Şəki) və “ARB 24”ün (Bakı) birgə yaratdığı ilk televiziya şəbəkəsidir.

ARB Bakı və Abşeron yarımadası ərazisində 37-ci tezlikdə (11 sektor) yayımlanır. Bölgələrdə isə yayım regional telekanalların – “ARB Kəpəz”, “ARB Şimal”, “ARB Cənub”, “ARB Aran” və “ARB Şəki”nin siqnalları vasitəsilə həyata keçirilir.

Telekanal açıq yayımla yanaşı, Azərbaycanın ilk peyki olan “Azerspace 1”in Avropa seqmentində, kabel televiziyası və internet şəbəkəsi vasitəsilə də yayımlanır.

Sosialyönümlü verilişlər, operativ informasiya proqramları, realiti-şoular, müxtəlif mövzulu gündüz proqramları ARB TV-nin yayım siyasətinin əsasını təşkil edir.

“Report” İnformasiya Agentliyinin kollektivi ARB TV-də çalışan həmkarlarını təbrik edir, onlara müvəffəqiyyətlər arzulayır.

Azərbaycan QHT-ləri Keniyada Milli Ağacəkmə Günündə bir neçə gün əvvəl ölkədə baş vermiş təbii fəlakət- kəskin yağıntılar nəticəsində həyatını itirmiş yüzlərlə keniyalının xatirəsinə təşkil olunan ağacəkmə aksiyasında iştirak ediblər.

COP29 Təşkilat Komitəsinin üzvü, “Sağlamlığa Xidmət” İctimai Birliyinin icraçı direktoru Pərvanə Vəliyeva vurğulayıb ki, Keniyada baş vermiş iqlim hadisəsi qlobal iqlim dəyişmələrinin fəsadlarını aydın şəkildə nümayiş etdirir.

Ekologiya və Təbii Sərvətlər Nazirliyi yanında İctimai Şuranın sədri, “Sudan İstifadə Sahəsində Mütəxəssislər” İctimai Birliyinin sədr müavini Amin Məmmədov qeyd edib ki, Azərbaycanda 2024-cü “Yaşıl Dünya Naminə Həmrəylik ili”dir, bu aksiyada iştirak Azərbaycanın həm də yaşıl dünya üçün qlobal mübarizəsinin bir rəmzi kimi qəbul oluna bilər.

“Minalar Əleyhinə Azərbaycan Kampaniyası” İctimai Birliyinin sədr müavini Roza Səfixanlı təhlükəsiz dünyanın hamı üçün vacib olduğunu diqqətə çatdırıb.

Azərbaycan Gənclər Təşkilatları Milli Şurasının sədri Rəfael Hacıbəyli də vurğulayıb ki, Azərbaycan gəncləri də yaşıl dünya üçün çalışır, bu ağacəkmə aksiyasında iştirak etməklə keniyalı həmkarları ilə həmrəylik nümayiş etdirirlər.

Qeyd edək ki, Azərbaycandan bir qrup QHT Keniyada BMT-nin Vətəndaş Cəmiyyəti Konfransında fəal iştirak edir. Bu günlərdə ilk dəfə olaraq Nayrobidə Azərbaycan və Keniya QHT-ləri arasında tanışlıq görüşü təşkil olunub, əməkdaşlıq imkanları geniş müzakirə olunub.