MANŞET
Onların borcu Vətəni qorumaq idi, bizim borcumuz isə onların adını yaşatmaqdır – MÜSAHİBƏ
Azərbaycan qürurlu-qələbəli tarix yaşayır. Tariximizin təhrifdən qorunub saxlanılmasında başlıca vəzifə arxivlərin üzərinə düşür. Azərbaycan Respublikası Milli Arxiv İdarəsi “Milli Arxiv Fondu haqqında” Qanuna uyğun olaraq, 44 günlük Vətən müharibəsində qəhrəmancasına şəhid olmuş Vətən övladlarının əziz xatirəsinin əbədiləşdirilməsi, həmçinin onlara aid olan sənədlərin vahid şəxsi arxiv fondunda toplanılması, mühafizəsi, istifadəsi və gələcək nəsillərə ötürülməsi məqsədilə müvafiq tədbirlər görür. Bu istiqamətdə II Vətən müharibəsinin Şirvan şəhərindən olan 24 şəhidinin 300 saxlama vahidindən ibarət olan şəxsi sənədləri Azərbaycan Respublikası Milli Arxiv İdarəsinin Dövlət Arxivinin (ARDA) Şirvan filialına təqdim olunub. Daha ətraflı məlumat vermək üçün ARDA Şirvan filialının direktor vəzifəsini icra edən Nəsibə xanım Məmmədova ilə olan müsahibəni təqdim edirik:
– Nəsibə xanım, müsahibəmizin əsas mövzusu arxivlərdə II Vətən müharibəsi şəhidlərinin şəxsi mənşəli arxiv fondunun yaradılmasıdır. Zəhmət olmasa deyin, şəxsi mənşəli arxiv fondu nədir?
– Bir şəxsin, ailənin, nəslin həyat və fəaliyyəti nəticəsində yaranan və hər hansı təşkilatın fəaliyyətində istifadə olunmayan yazılı materialların məcmusu şəxsi mənşəli sənədlər hesab olunur. Fiziki şəxslərdən, vətəndaşlardan dövlət mühafizəsinə qəbul edilən sənədlərdən şəxsi mənşəli arxiv fondu və yaxud arxiv kolleksiyası yaradılır. Şəxsi mənşəli arxiv fondunun özü də şəxsi fonda, ailə fonduna və nəsil fonduna bölünür. Şəxsi fond – bir şəxsin həyatı, elmi və xidməti fəaliyyəti, yaradıcılığı, xatirəsinin əbədiləşdirilməsi zamanı yaranan sənədlərdən formalaşdırılır; Ailə fondu – bir ailənin üzvlərinin həyatı və fəaliyyəti nəticəsində yaranan sənədlərdən formalaşdırılır; Nəsil fondu – bir nəslin (ata, oğul, baba) və onlara yaxın olan qohumların həyat və fəaliyyəti nəticəsində yaranan sənədlərdən formalaşdırılır.
– ARDA Şirvan filialında nə qədər şəxsi mənşəli arxiv sənədləri mühafizə olunur?
– Nəzərinizə çatdırım ki, 435 № li “Vətən Müharibəsi Şəhidləri- Zəfərimizin Qəhrəmanları” Azərbaycan Respublikası Milli Arxiv İdarəsinin Şirvan filialında yaradılan ilk şəxsi mənşəli fonddur. Növbəti addımımız 44 günlük Vətən müharibəsində qəhrəmancasına vuruşmuş qazilərimizin sənədlərini toplamaq, onların şəxsi mənşəli fondunu yaratmaq olub. Xüsusilə fərqlənmiş, orden və medallarla təltif olunmuş hərbçilərimiz var. Onların hekayələri, döyüş yolları ətraflı araşdırılaraq qələmə alınacaq. Onların hər biri Şirvan şəhəri, hətta ölkə üçün nümunə göstəriləsi insanlardır. Yetişməkdə olan yeni nəslin milli ruhda böyüməsi üçün canlı arxiv olan qəhrəmanlarımızın döyüş yolunu bilmələri olduqca vacibdir. Həmçinin Şirvan şəhərinin aydınlarının, dəyərli şair, publisist, alimlərinin də şəxsi mənşəli fondları yaradılacaq, yaradıcılıq fəaliyyətlərini əks etdirən sənədləri fonda daxil ediləcəkdir.
– Şirvan filialında mühafizə olunan sənədlərdən kimlər və necə istifadə edə bilər?
– Vətəndaşlar, idarə, müəssisə və təşkilatlar, tədqiqatçılar rəsmi sorğu vasitəsilə bizə müraciət edir və filialımızda saxlanan sənədlərdən müvafiq qaydada informasiya, arxiv arayışları, arxiv sənədlərindən surətlər əldə edə bilirlər. Eləcə də, arxiv əməkdaşları mühafizə olunan sənədlər barədə maraqlı yazılarla mətbuatda çıxış edirlər. Arxivin illik iş planına uyğun olaraq məktəblilərlə, tələbələrlə görüşlər, sərgilər keçirilir.
– Qeyd etdiyiniz kimi, artıq Şirvan şəhidlərinin şəxsi sənədlərinin və fotoalbomlarının surətlərindən ibarət kolleksiyası Şirvan filialında 435 № li “Vətən Müharibəsi Şəhidləri – Zəfərimizin Qəhrəmanları” adlı fondda mühafizə olunur. Fond necə yarandı?
– Azərbaycan dövləti tərəfindən şəhid ailələri və Vətən müharibəsi iştirakçılarına diqqət və qayğı həmişə diqqət mərkəzində saxlanılıb. Əsası ilk dəfə ulu öndər Heydər Əliyev tərəfindən qoyulan fundamental sosial siyasi ənənənə bu gün müzəffər Ali Baş Komandan İlham Əliyev, eləcə də, birinci xanım Mehriban Əliyeva tərəfindən davam etdirilir. Bu siyasi kursun davamı olaraq “Milli Arxiv Fondu haqqında” Qanuna istinadən, 44 günlük Vətən müharibəsində qəhrəmancasına şəhid olmuş Vətən övladlarının əziz xatirəsinin əbədiləşdirilməsi, həmçinin onlara aid olan sənədlərin vahid şəxsi arxiv fondunda toplanılması, mühafizəsi, istifadəsi və gələcək nəsillərə ötürülməsi məqsədilə müvafiq tədbirlərin keçirilməsinə dair Milli Arxiv İdarəsinin tövsiyələri məni çox sevindirdi. Düşünürəm ki, damarlarında azərbaycanlı qanı dolaşan hər bir vətəndaş xalq üçün , millət üçün əlindən gələni əsirgəməməlidir. Onların borcu Vətəni qorumaq idi, bizim borcumuz isə onların adını daimi yaşatmaq, xatirələrini qoruyub gələcək nəsillərə ötürməkdir.
24 siyahıya 300 saxlama vahidi daxildir. Hər vərəqdə bir qəhrəmanlıq yatır. Bunlar arasında şəhidlərimizin şəxsi qeydləri olan dəftərləri, analarına yazdıqları məktublar, qələmə aldıqları şeirlər, hətta çəkdikləri rəsmlər də yer alıb. Bu fondun yaranması mənim üçün 24 fərqli ailə ilə yaxından tanış olmaq, kədəri də, qüruru da onlarla birgə yaşamağın nə demək olduğunun fərqinə varmaq idi. Fond materiallarını toplamaq iki ay ərzində baş tutdu. Bu iki ayda mən özümə 24 ev qazandım. Xalqımıza məxsus səmimiyyət və qonaqpərvərliklə qarşılandım. Ailələr sənədlərin toplanmasına şərait yaratdılar. Onlarla birgə çörək kəsdik. Ailələrin psixoloji vəziyyəti, qəhrəman balalarından gözləri dola-dola, qürurla bəhs etmələri insanın ruhunu titrətməyə bilməzdi. İnsanı qürurlandıran məqamlardan biri də odur ki, cəbhə xəttindən çox uzaq bir bölgədə doğulub böyümələrinə baxmayaraq, torpağın hər qarışını Vətən bilib, can qoyan igidlər diyarıdır Azərbaycan.
– Bu, çox gözəl haldır ki, şəhid valideynləri ilə şəxsən tək-tək görüşmüsüz. Şəhid valideynləri ilə söhbətlərinizdən nələr yadınızda qalıb?
– Elə analar var ki, onlar hamımızın anası, elə oğullar var ki, onlar hamımızın balasıdır. Şəhid valideynləri bu günümüzün müqqəddəs ata və analarıdır. Həmsöhbət olarkən öz məsləhətlərindən qalmırdılar. Demək olar ki, hər birinin sözləri yaddaşımdadır. Sevincləri, kədərləri ürəyimdədir. Onların gənc nəslə ümumi bir məsləhəti var: “Balalarınızın sayını artırın”.
Qəhrəmanımız Zülfiqarlı Zeynalın atası Alim kişinin sözləri heç vaxt yadımdan çıxmaz: “3000 şəhid anasının kədər göz yaşlarından 350 milyon türk dünyasının sevinc yaşlarında qızıl güllər bitir”. Bu cümlədə qəhrəmanlıq yatır, qürur yatır. Bu cümlədə türkçülük yatır, vətənpərvərlik yatır.
“Mən öləndə kəfənimi Şuşanın ağ buludlarından biçərsiz” deyən bir şəhid atası…
Anaların hamısının ürək parçalayan sözü: “Elə darıxmışam ki, balam üçün” ….
Şəhid Mənəfli Əlinin anası Simuzər xanım “ Bu dünyada hər şeyimiz var, bircə balam yoxdur. Elə darıxıram ki, o dünyaya gedib balama qovuşacağım günü gözləyirəm”.
Şəhid Əliyev Elçinin anası Rahilə xanım “ Mən nə bilərdim ki, evimdə şəhid böyüdürəm, saçlarıma şəhid əlləri sığal çəkir”.
Şəhid Məharət Həsənovun gül balası 9 yaşlı Ramilin ürək dağlayan sözləri : “Anam mənə deyir salavat çək, atanı görəcəksən, mən hər gecə yatanda da salavat çəkirəm, səhər oyananda da, amma atamı görə bilmirəm…..”
Xatırladım ki, mən də iki oğul böyüdürəm. Şəhid valideynlərindən uşaqları necə vətənpərvər böyütmək lazım olduğunu bir daha öyrəndim. Müharibə gözüyaşlı qalan şəhid sevgiləri, tanıdıqlarımız və tanımadıqlarımız gizli qalan sevgilər, yarımçıq hekayələr, atasız böyüyən, hətta atasız doğulan balalar qoydu geridə. Bizim borcumuz hər zaman bu övladların gələcəyi naminə əlimizdən gələnləri etməkdir.
– Həyəcanınız, hissləriniz doğmadır, Nəsibə xanım.
– Şəhid Alişanlı Amalın şəxsi dəftərində yazdığı bu sözlər məni çox təsirləndirdi:
“Ana qədrini bilməyən oğul əsgərlik məqamı çatanda bilər.
Ana əllərinin hərarətini dəmir çarpayıda yatanda bilər”
– Sonda arxiv işinin məsuliyyətini oxuculara necə izah edərdiniz?
– Mən bu məqamda ulu öndər Heydər Əliyevin bir kəlamını xatırlatmaq istərdim: “Tarixi olduğu kimi qəbul etmək, dərk etmək və olduğu kimi qiymətləndirmək lazımdır. Tarixi təhrif etmək də olmaz, tariximizdəki qara ləkələri, qara səhifələri unutmaq da olmaz”. Tariximizi yaşadan yer isə arxivdir. Bu sahədə arxiv işçilərinin məsuliyyəti daha böyükdür. Hər zaman çalışırıq ki, öhdəmizə düşən vəzifəni layiqincə yerinə yetirək. Mənfur düşmənlərimiz olmayan faktları sənədləşdirərək, arxivləşdirib tarixini saxta yollarla zənginləşdirməyə çalışırlar. Biz hər zaman çalışmalıyıq ki, xalqımızın qəhrəmanlıqlarını arxivləşdirək. Arxiv faktdır, danılmazdır. Bizim xalqın xəmiri qəhrəmanlıqla, azadlıq uğrunda mübarizə ilə yoğrulub. Bu yerdə sözlərimi yenə də ulu öndər Heydər Əliyevin çox sevdiyim bir kəlamı ilə bitirmək istərdim: “Arxiv işlərinə gərək çox ciddi fikir verək. Bir tərəfdən ona görə ki, bu, xalqımızın tarixini əks etdirən yeganə mənbədir. İkinci də ona görə ki, tariximizi təhrif edənlərin qarşısını almaq üçün çox mühüm amildir”.
Rizvan FİKRƏTOĞLU
ShekiMedia.az
Digər xəbərlərə də bax
MANŞET
Ceyhun Bayramov UNESCO üzrə Milli Komissiyaların rəhbərləri ilə cari regional vəziyyəti müzakirə edib
Azərbaycanın xarici işlər naziri Ceyhun Bayramov VI Ümumdünya Mədəniyyətlərarası Dialoq Forumunda iştirak məqsədilə ölkəmizdə səfərdə olan UNESCO-ya üzv ölkələrin daimi nümayəndələri, habelə Türkiyə, Rusiya, Birləşmiş Krallıq və Maltanın UNESCO üzrə Milli Komissiyalarının rəhbərləri ilə görüşüb.
Xarici İşlər Nazirliyindən bildirilib ki, görüş zamanı UNESCO çərçivəsində əməkdaşlıqdan irəli gələn məsələlər, BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) hazırlıq işləri, habelə cari regional vəziyyət müzakirə olunub.
C.Bayramov ölkəmizin təşəbbüsü ilə başladılan “Bakı Prosesi” çərçivəsində həyata keçirilən beynəlxalq layihələrin, o cümlədən Ümumdünya Mədəniyyətlərarası Dialoq Forumunun ölkəmiz tərəfindən mədəni müxtəlifliklər arasında əməkdaşlığa verilən əhəmiyyət və töhfənin göstəricisi olduğunu diqqətə çatdırıb. Sözügedən layihələrin beynəlxalq tərəfdaşlar, o cümlədən UNESCO ilə əməkdaşlıq çərçivəsində reallaşdırılmasının, habelə nümayiş olunan aktiv iştirakçılığın məmnunluq doğurduğu qeyd olunub.
Azərbaycanın COP29 sədrliyi çərçivəsində qlobal iqlim dəyişikliyi ilə mübarizə üzrə beynəlxalq səylərin səfərbər edilməsi istiqamətində görülən işlər barədə görüş iştirakçılarını ətraflı məlumatlandıran nazir iqlim məsələləri ilə bağlı maarifləndirmə fəaliyyətinin və bu istiqamətdə birgə əməkdaşlığın vacibliyini diqqətə çatdırıb.
XİN başçısı postmünaqişə dövründə bölgədə normallaşma, sülh və quruculuq, habelə keçmiş işğal dövründə dağıntılara məruz qalmış mədəni irsin bərpası səylərindən bəhs edib. O, ölkəmizin xarici siyasət prioritetləri, bir sıra regional məsələlərə baxışları barədə görüş iştirakçılarını məlumatlandırıb.
Görüşdə, həmçinin qarşılıqlı maraq doğuran digər məsələlər ətrafında fikir mübadiləsi aparılıb, iştirakçıların sualları cavablandırılıb.
CƏMİYYƏT
Sabahın HAVA PROQNOZU – 02.05.2024
Mayın 2-də Azərbaycanda müşahidə ediləcək hava proqnozu açıqlanıb.
Bu barədə Milli Hidrometeorologiya Xidmətindən məlumat verilib.
Bildirilib ki, sabah Bakıda və Abşeron yarımadasında hava şəraitinin əsasən yağmursuz keçəcəyi gözlənilir. Arabir güclənən şimal-qərb küləyi əsəcək. Havanın temperaturu gecə 13-16° isti, gündüz 19-23° isti olacaq. Atmosfer təzyiqi 758 mm civə sütunundan 754 mm civə sütununa enəcək. Nisbi rütubət gecə 60-70%, gündüz 40-45% olacaq.
Azərbaycanın rayonlarında da havanın əsasən yağmursuz keçəcəyi, lakin gündüz bəzi şimal və şərq rayonlarında arabir yağıntılı olacağı gözlənilir. Ayrı-ayrı yerlərdə şimşək çaxacağı, dolu düşəcəyi ehtimalı var. Gecə və səhər bəzi yerlərdə arabir duman olacaq. Şərq küləyi ayrı-ayrı yerlərdə arabir güclənəcək. Havanın temperaturu gecə 11-16° isti, gündüz 23-28° isti, dağlarda gecə 7-12° isti, gündüz 15-20° isti olacaq.
CƏMİYYƏT
Bu gündən Azərbaycanda balıq ovu qadağan edilir
Balıqların kürütökmə dövrü ilə əlaqədar may ayının 1-dən Azərbaycanda bütün su hövzələrində balıq ovuna moratorium qüvvəyə minir.
Proses sentyabrın 1-dək davam edəcək.
Sənaye üsulu ilə balıq ovu ilə məşğul olan fiziki və hüquqi şəxslər bütün təbii su hövzələrindən balıq ovu alətlərinin kənarlaşdırılmasını may ayının 1-dək təmin etməlidir, əks halda ov alətlərinin su hövzələrində saxlanılması qanun pozuntusu hesab ediləcək və həmin şəxslər barəsində qanunamüvafiq qaydada intizam tədbirləri tətbiq olunacaq.
Qeyd edək ki, Qanunsuz balıq ovunun qarşısının alınması məqsədilə Ekologiya və Təbii Sərvətlər Nazirliyinin Dövlət Ekoloji Təhlükəsizlik və Bioloji Müxtəlifliyin Qorunması Xidmətlərinin, Daxili İşlər Nazirliyinin Su Nəqliyyatında Polis İdarəsinin əməkdaşları tərəfindən ölkənin daxili su hövzələrində mütəmadi nəzarət tədbirləri həyata keçirilir və qanunsuz balıq ovu ilə məşğul olan şəxslər barəsində qanunamüvafiq tədbirlər görülür.