Fevralın 15-də Oğuz və Qəbələ rayon yazıçılarının təşəbbüsü ilə Oğuz rayon Sincan kənd şəhidi Məmmədov Tural Arif oğlunun xatirəsi anılıb.
Şəhidlər unudulanda ölürlər. Onları yad etmək, xatırlamaq, daim yaşatmaq bizim borcumuzdur. Çünki bizim bu günki günlərimiz üçün onlar öz əziz canlarını qurban veriblər. Anım günündə Oğuz rayon MKS-nin Sincan kənd kitabxanası, Folklor klubu, Sincan kənd İcra Nümayəndəliyi, Sincan kənd tam orta məktəbi, kənd ictimaiyyəti və yazıçılar iştirak ediblər. Əvvəlcə Şəhidin məzarı ziyarət edilib. Sincan kənd qəbiristanlığında uyuyan Məmmədov Tural Arif oğlunun və Nuralıyev Elşən Rövşən oğlunun məzarlarına gül dəstələri qoyulub, şəhidlərin və qardaş Türkiyədə zəlzələ nəticəsində həlak olan həmvətənlərimizin ruhuna dualar oxunub.
ShekiMedia.az xəbər verir ki, Sincan kənd kitabxanasının müdiri Ramiyyə Əzizova Oğuz və Qəbələ yazarlarını salamlayıb və bu təşəbbüs iştirakçılarına minnətdarlığını bildirib.
Sincan kənd tam orta məktəbinin şagirdləri, kitabxananın fəal oxucuları kompozisiya təqdim ediblər.
Sonra Respublika “Qanun keşiyində” qəzetinin müxbiri Simuzər Mustafayeva, “Qəbələnin səsi” ədəbi birliyinin müavini, şair Mirhəsən Ağayev, üzvləri – şairə Şəhla Xəlilqızı, şair Emin Baratoğlu, şair Vidadi Sədullayev, şair Asim Məmmədov, şair, şəhid atası Cəlil Xeyirbəy, şairə Elza Dəniz Nur çıxış edərək şəhidlərimiz haqqında xoş sözlərini bildirmiş, şeirlərindən parçalar söyləyiblər.
Oğuz rayon yazarlarından Nazim Hüseynli,
Yusif Rzayev, şairə Sədaqət Oğuzlu və şairə, şəhid bacısı Şükufə Ruhlu çıxış edərək şəhidlərimizi yaddan çıxarmamaq üçün daim yad etməyin vacib olduğunu bildirib və şeirlərini şəhid balalara ithaf edərək oxuyublar. Sonda şəhid atası Arif Məmmədov çıxış edərək, təşkilatçılara və iştirak edənlərə təşəkkür edib. Xatirə şəkli çəkilib.
Sonra tədbir iştirakçıları evə dəvət edilib, ehsan süfrəsi ətrafında Tural bir daha yad edilib, xoş xatirələri anılıb. Qəbələnin şairə xanımı Şəhla Xəlilqızı Tural haqqında yazmış olduğu şeiri səsləndirib və ailəyə təqdim edib. Şairə Elza Dəniz Nur çapdan çıxmış “Bəxt aynası” adlı şeirlər kitabını ailəyə və Sincan kənd kitabxanasına hədiyyə edib.
Qonaqlar Turalın xatirələrindən ibarət otağı və sərğiləri ilə tanış olub, bir daha Allahdan şəhidimizə rəhmət, əzizlərinə səbirlər diləyiblər.
Allah bütün şəhidlərə rəhmət eləsin!