MANŞET
“ADEX” – qalib ölkənin növbəti zəfəri
Pandemiya ilə əlaqədar yaranan dördillik fasilədən sonra “ADEX” sərgisi yenidən Azərbaycanın paytaxtı Bakı şəhərində yüksək səviyyədə təşkil edildi. Sərgi müdafiə sənayesi sektorunda yeniliklərin tanıdılması, eləcə də istehsalçılar və istifadəçilər arasında biznes münasibətlərinin qurulması baxımından da ən uyğun platformadır. Ölkəmiz 2014-cü ildən “ADEX” sərgisinə evsahibliyi edir. Sərgi Azərbaycan müdafiə sənayesinin imkanlarının dünyaya tanıdılmasında mühüm rol oynayır. Bakıda “ADEX” sərgisi ilə paralel olaraq XIII Beynəlxalq Daxili Təhlükəsizlik, Mühafizə və Xilasetmə “Securex Caspian” sərgisi də təqdimatını uğurla həyata keçirdi.
Sərgilərin yüksək səviyyədə keçirilməsinin ən başlıca xüsusiyyəti, dövlət səviyyəsində bu tədbirlərə diqqətin ayrılmasından ibarət oldu. Azərbaycan növbəti dəfə yeniliyə imza atdı – Türkiyə, Rusiya, İran, Bolqarıstan, Çin, Fransa, İtaliya, Niderland, İordaniya kimi 26 ölkənin 208 şirkətini Bakıda bir araya gətirdi. Bu, həm də qalib ölkənin növbəti zəfəri idi. “ADEX” sərgisinin xüsusi əhəmiyyəti ondan ibarət idi ki, sərgi Azərbaycanın İkinci Qarabağ müharibəsində qazandığı şanlı Zəfərdən sonra ilk dəfə təşkil olunurdu. “ADEX” çərçivəsində Azərbaycan Ordusunun Qələbəsində müstəsna rol oynamış ölkənin hərbi-sənaye kompleksinin gücü və qüdrəti, müasir silahlar sərgiləndi.
Əvvəlcə, Azərbaycan Respublikasının Prezidenti, Silahlı Qüvvələrin müzəffər Ali Baş Komandanı İlham Əliyev sentyabrın 6-da Bakı Ekspo Mərkəzində keçirilmiş IV Azərbaycan Beynəlxalq Müdafiə “ADEX” və XIII Beynəlxalq Daxili Təhlükəsizlik, Mühafizə və Xilasetmə “Securex Caspian” sərgiləri ilə tanış oldu, daxili pavilyonlardakı stendlərə baş çəkdi. Dövlət başçımız müraciətində “ADEX” sərgisinin hərbi-texniki əməkdaşlığın inkişafı, ən müasir silah, texnika və texnologiyaların nümayiş etdirilməsi üçün mühüm platformaya çevrildiyini, dünyanın tanınmış hərbi sənaye müəssisələrini, nüfuzlu xarici şirkət və təşkilatlarını, rəsmi nümayəndə heyətlərini və mütəxəssislərini eyni məkanda toplayaraq işgüzar əlaqələrin qurulması və yeni müqavilələrin imzalanması üçün geniş imkanlar yaratdığını diqqətə çatdırdı.
Azərbaycan Respublikasının Müdafiə Sənayesi naziri Mədət Quliyev “ADEX” və “Securex Caspian” sərgiləri çərçivəsində bir sıra görüşlər keçirdi. Belə ki, nazir sentyabrın 7-də Bolqarıstanın İqtisadiyyat və Sənaye naziri Nikola Stoyanov, İordaniya Haşimilər Krallığının Baş Qərargah rəisi Yousef Ahmad Hamed Alhnaity, Qətər dövlətinin Müdafiə Nazirliyinin Hərbi İstehsalat İdarəsinin rəhbəri Salem Mohammed Almarri və onların rəhbərlik etdikləri nümayəndə heyətləri ilə bir araya gəldi. Qonaqlar ölkəmizdə olmaqdan məmnunluqlarını ifadə etdilər, “ADEX” və “Securex Caspian” sərgilərinin Azərbaycanda yüksək peşəkarlıqla təşkil edildiyini, burada əlverişli əməkdaşlıq şəraitinin yaradıldığını vurğuladılar. Onlar sərginin əhəmiyyətini yüksək qiymətləndirdilər. Görüşlərdə qarşılıqlı hərbi-texniki əməkdaşlığın perspektivləri müzakirə olundu, maraq doğuran digər məsələlər barədə geniş fikir mübadiləsi aparıldı.
Bakı Ekspo Mərkəzində keçirilmiş “ADEX-2022” 4-cü Azərbaycan Beynəlxalq Müdafiə Sərgisi çərçivəsində Azərbaycan Respublikasının Müdafiə naziri, general-polkovnik Zakir Həsənov ölkəmizə səfərə gələn Türkiyə Respublikası Silahlı Qüvvələrinin Baş Qərargah rəisi, ordu generalı Yaşar Güler, Ruanda Respublikasının Müdafiə naziri, general-mayor Murasira Albert, Bosniya və Herseqovina Respublikasının Müdafiə naziri Sifet Podçiç, Belarus Müdafiə Sənayesi Komitəsinin sədri Dmitri Pantus, Qazaxıstan Respublikası Müdafiə nazirinin müavini, general-leytenant Ruslan Şpekbayev və digərləri ilə görüşdü. Bu görüşlərdə ölkələrimiz arasında regional təhlükəsizlik, hərbi, hərbi-texniki, hərbi təhsil və hərbi tibb sahələrində əməkdaşlıq, qarşılıqlı səfərlərinin təşkili, eləcə də maraq doğuran digər məsələlər müzakirə olundu.
Müdafiə naziri Zakir Həsənov sərgidə iştirak etmək üçün ölkəmizdə səfərdə olan bir sıra şirkətlərin rəhbər heyətləri ilə də görüşlər keçirdi. Belə görüşlərdən biri İsrailin “Rafael” şirkətinin rəhbəri Yoav Har-Even ilə baş tutdu. Azərbaycan ilə İsrail arasında hərbi əməkdaşlığın güclənməsinin vacibliyi və dövlətlərimizin regional təhlükəsizliyə verdiyi töhfələr barədə ətraflı fikir mübadiləsi aparıldı, eyni zamanda, Azərbaycan – İsrail hərbi əlaqələrinin möhkəmlənməsində bu cür görüşlərin və qarşılıqlı səfərlərin zəruriliyi xüsusi vurğulandı.
Azərbaycan Hərbi Hava Qüvvələrinin (HHQ) komandanı, general-leytenant Ramiz Tahirov da 4-cü “ADEX” sərgisini ziyarət etdi. HHQ-nin komandanı Müdafiə Sənayesi Nazirliyi, yerli və xarici şirkətlərin istehsalı olan məhsullar ilə tanış oldu. Ramiz Tahirov daha sonra Türkiyənin MKE (Makine ve Kimya Endüstrisi”) ilə SDT (“Kosmik və Müdafiə Texnologiyaları”) şirkətinin məhsulları ilə maraqlandı.
Həmçinin, Daxili İşlər Nazirinin müavini, Daxili Qoşunların Komandanı, general-leytenant Şahin Məmmədov sərgini ziyarət etdi. Şahin Məmmədov Türkiyənin “Otokar” şirkətinin nümayəndə heyəti ilə görüşdü. Daxili Qoşunların Komandanı Müdafiə Sənayesi Nazirliyinin, yerli və xarici şirkətlərin stendləri və məhsulları ilə tanış oldu.
Xarici təmsilçilər də Azərbaycanın güc strukturlarının nümayəndələrinin sərgilərdə xüsusi diqqətini təqdirəlayiq hesab etdilər. TUSAŞ şirkəti İdarə Heyətinin sədri Rafet Bozdoğan “Xalq qəzeti” ilə fikirlərini bölüşərkən bildirdi ki, açılışdan sonra Prezident İlham Əliyev və komandası onları ziyarət etdi və stendlərdəki məhsullarla maraqlandılar: “Azərbaycan və onun bütün yüksək səviyyəli rəhbərləri bizim stendimizlə çox maraqlandılar. Azərbaycan, həqiqətən, gözəl evsahibliyi ilə stendimizə ən yüksək səviyyədə qayğı göstərdi. Bundan sonra burada qonaq olan digər ölkələrin baş qərargah rəisləri və digər yüksək ranqlı qonaqlarımız gəldilər. İordaniya Baş Qərargah rəisi stendimizi ziyarət etdi. Onlar da məhsullarımızla maraqlandılar. Texniki səfər və müəssisə səfərindən danışdılar. Bosniya və Herseqovinanın Müdafiə naziri qonağımız oldu”.
Bakı Ekspo Mərkəzində keçirilmiş IV Azərbaycan Beynəlxalq Müdafiə “ADEX” və XIII Beynəlxalq Daxili Təhlükəsizlik, Mühafizə və Xilasetmə “Securex Caspian” sərgiləri beynəlxalq status səviyyəsi daşıyır. Bu sərgilərin keçirildiyi məkan Azərbaycanın paytaxtı Bakı idi. Qalib ölkənin paytaxtı Bakı şəhəri. Dünya ictimaiyyəti Azərbaycanın hərbi gücünə daha əvvəldən bələd idi – İkinci Qarabağ müharibəsində təkrar şahid olmuşdular. Bu dəfə isə Azərbaycan təcrübəsini şəxsən görmək onlar üçün də maraqlı idi. Bu maraq heç də təsadüfi deyildi. Dünya bir daha əmin oldu ki, 30 illik işğala son qoyan güclü ordu, güclü rəhbərlik və bir də “dəmir yumruq” idi.
Xülasə, ölkəmiz adından görülən tədbirlər, beynəlxalq səviyyədə təşkil olunan hərbi sərgilər, qazanılan uğurlar, qələbələr sevincimizə sevinc qatır. Hələ bayrağımızın beynəlxalq təşkilatların binaları önündə sayılıb-seçilən dövlətlərin bayraqları sırasında dalğalanması, beynəlxalq tədbirlərdə, dünya ölkələrinin ərazisində yer alması qürurumuzdur. Azadlıq – Vətən, torpaq uğrunda canını qurban vermiş şəhidlərimizin, şanlı bayrağımızı yüksəklərə ucaltmağa nail olmuş qazilərimizin hünəri ilə mümkün olmuşdur. Onlar bu yolda canlarını, qanlarını əsirgəmədilər. Heç təsadüfi deyil ki, Bakı metrostansiyasında belə “Azadlıq”a gedən yol “20 Yanvar”dan keçir. Ən əsası, bu yolların bir dayanacağı “8 Noyabr” stansiyasıdır. Növbəti stansiya, yəqin ki, Zəngəzur olar.
Rizvan FIKRƏTOĞLU
Digər xəbərlərə də bax
CƏMİYYƏT
DİN valideynlərə müraciət etdi
Daxili İşlər Nazirliyi (DİN) valideynlərə müraciət ünvanlayıb.
Müraciətdə deyilir:
“Övladlarınızın internetdə təhlükəsizliyini təmin etmək üçün yalnız sizin nəzarətiniz altında internetdən istifadəsinə icazə verin. Uşaqlarınızın internetdə oynadıqları oyunlar haqqında məlumatlı olun.
Şifrə olaraq, mürəkkəb şifrə seçməkdə uşaqlara yaxından kömək edin” , – deyə müraciətdə bildirilib.
MANŞET
Ceyhun Bayramov UNESCO üzrə Milli Komissiyaların rəhbərləri ilə cari regional vəziyyəti müzakirə edib
Azərbaycanın xarici işlər naziri Ceyhun Bayramov VI Ümumdünya Mədəniyyətlərarası Dialoq Forumunda iştirak məqsədilə ölkəmizdə səfərdə olan UNESCO-ya üzv ölkələrin daimi nümayəndələri, habelə Türkiyə, Rusiya, Birləşmiş Krallıq və Maltanın UNESCO üzrə Milli Komissiyalarının rəhbərləri ilə görüşüb.
Xarici İşlər Nazirliyindən bildirilib ki, görüş zamanı UNESCO çərçivəsində əməkdaşlıqdan irəli gələn məsələlər, BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) hazırlıq işləri, habelə cari regional vəziyyət müzakirə olunub.
C.Bayramov ölkəmizin təşəbbüsü ilə başladılan “Bakı Prosesi” çərçivəsində həyata keçirilən beynəlxalq layihələrin, o cümlədən Ümumdünya Mədəniyyətlərarası Dialoq Forumunun ölkəmiz tərəfindən mədəni müxtəlifliklər arasında əməkdaşlığa verilən əhəmiyyət və töhfənin göstəricisi olduğunu diqqətə çatdırıb. Sözügedən layihələrin beynəlxalq tərəfdaşlar, o cümlədən UNESCO ilə əməkdaşlıq çərçivəsində reallaşdırılmasının, habelə nümayiş olunan aktiv iştirakçılığın məmnunluq doğurduğu qeyd olunub.
Azərbaycanın COP29 sədrliyi çərçivəsində qlobal iqlim dəyişikliyi ilə mübarizə üzrə beynəlxalq səylərin səfərbər edilməsi istiqamətində görülən işlər barədə görüş iştirakçılarını ətraflı məlumatlandıran nazir iqlim məsələləri ilə bağlı maarifləndirmə fəaliyyətinin və bu istiqamətdə birgə əməkdaşlığın vacibliyini diqqətə çatdırıb.
XİN başçısı postmünaqişə dövründə bölgədə normallaşma, sülh və quruculuq, habelə keçmiş işğal dövründə dağıntılara məruz qalmış mədəni irsin bərpası səylərindən bəhs edib. O, ölkəmizin xarici siyasət prioritetləri, bir sıra regional məsələlərə baxışları barədə görüş iştirakçılarını məlumatlandırıb.
Görüşdə, həmçinin qarşılıqlı maraq doğuran digər məsələlər ətrafında fikir mübadiləsi aparılıb, iştirakçıların sualları cavablandırılıb.
CƏMİYYƏT
Sabahın HAVA PROQNOZU – 02.05.2024
Mayın 2-də Azərbaycanda müşahidə ediləcək hava proqnozu açıqlanıb.
Bu barədə Milli Hidrometeorologiya Xidmətindən məlumat verilib.
Bildirilib ki, sabah Bakıda və Abşeron yarımadasında hava şəraitinin əsasən yağmursuz keçəcəyi gözlənilir. Arabir güclənən şimal-qərb küləyi əsəcək. Havanın temperaturu gecə 13-16° isti, gündüz 19-23° isti olacaq. Atmosfer təzyiqi 758 mm civə sütunundan 754 mm civə sütununa enəcək. Nisbi rütubət gecə 60-70%, gündüz 40-45% olacaq.
Azərbaycanın rayonlarında da havanın əsasən yağmursuz keçəcəyi, lakin gündüz bəzi şimal və şərq rayonlarında arabir yağıntılı olacağı gözlənilir. Ayrı-ayrı yerlərdə şimşək çaxacağı, dolu düşəcəyi ehtimalı var. Gecə və səhər bəzi yerlərdə arabir duman olacaq. Şərq küləyi ayrı-ayrı yerlərdə arabir güclənəcək. Havanın temperaturu gecə 11-16° isti, gündüz 23-28° isti, dağlarda gecə 7-12° isti, gündüz 15-20° isti olacaq.