Şəki Şəhər Uşaq İncəsənət Məktəbinin fəaliyyətə başlamasından 85 il ötür.
Özünə məxsus musiqi ənənələri ilə seçilən bu təhsil ocağının 85 illiyi münasibətilə Şəki Heydər Əliyev Mərkəzində keçirilən yubiley tədbirində Şəki Şəhər İcra Hakimiyyətinin, Şəki-Zaqatala Regional Mədəniyyət İdarəsinin rəhbərliyi, ictimaiyyət nümayəndələri, məktəbin yetirmələri və musiqisevərlər iştirak ediblər.

Tədbir iştirakçıları əvvəlcə mərkəzin foyesində məktəbin müəllim və şagirdlərinin əl işlərindən ibarət sərgiyə baxıblar.

Yubiley tədbirinin əvvəlində Şəki Şəhər Uşaq İncəsənət Məktəbinin 85 ildə keçdiyi yola qısa nəzər salınıb, qazanılan nailiyyətlərdən danışılıb, məktəbin tarixini və fəaliyyətini əks etdirən videoçarx nümayiş etdirilib.

Diqqətə çatdırılıb ki, məktəb 1938-ci ildə fəaliyyətə başlayıb. Fəaliyyəti dövründə məktəbin minlərlə məzunu olub. Hazırda onların əksəriyyəti Şəkidə, həmçinin respublikamızın digər şəhər və rayonlarında musiqi müəllimi, xoreoqraf, rəssam, ifaçı kimi fəaliyyət göstərirlər. Məktəbin məzunları arasında onlarla tanınmış musiqiçinin adına rast gəlmək olar.
Hazırda məktəbdə fortepiano, tar, kamança, skripka, qarmon, nağara, xoreoqrafiya və rəssamlıq ixtisasları üzrə 407 şagird təhsil alır. Məktəbin şagirdləri, musiqi və rəqs kollektivləri respublika səviyyəli müsabiqə və festivallarda həmişə uğurlu çıxışları ilə fərqlənib, mükafata layiq görülüblər. Məktəbin direktoru Eldar Rəcəbovun rəhbərlik etdiyi “Zirvə” instrumental ansamblı öz dəsti-xətti ilə seçilir və respublikamızın tanınmış musiqi kollektivlərindən biri hesab olunur.

Yubiley tədbirində Şəki Şəhər İcra Hakimiyyətinin başçısı Elxan Usubov çıxış edərək, Uşaq İncəsənət Məktəbinin 85 illik yubileyinin qeyd edilməsinin Şəkinin mədəni həyatında olduqca əlamətdar hadisə olduğunu bildirib, kollektivə gələcək fəaliyyətində yeni yaradıcılıq uğurları arzulayıb.

Şəki-Zaqatala Regional Mədəniyyət idarəsinin rəis əvəzi Nargilə Qafarova çıxış edərək kollektivi 85 illik yubileyi münasibəti ilə təbrik etmiş və uğurlar arzulamışdır.

Sonra Şəki Şəhər Uşaq İncəsənət Məktəbinin musiqi və rəqs kollektivləri tamaşaçılar qarşısında geniş konsert proqramı ilə çıxış ediblər.

Tədbirin sonunda 85 illik yubileyi ilə əlaqədar gənc nəslin estetik tərbiyəsində səmərəli fəaliyyətinə görə Şəki şəhər Uşaq İncəsənət məktəbinə Azərbaycan Respublikası Mədəniyyət Nazirliyinin və Şəki Şəhər İcra Hakimiyyətinin Fəxri Fərmanları təqdim edilib.

Bu gün Bakıda VI Ümumdünya Mədəniyyətlərarası Dialoq Forumu öz işinə başlayacaq.

Tədbir 1-3 may tarixlərində keçiriləcək.

Forum çərçivəsində on panel müzakirə və dörd plenar sessiyanın keçirilməsi nəzərdə tutulur. Forumda müzakirə olunacaq mövzular təhsil, gənclər, xüsusilə də iqlim dəyişikliyi fonunda mədəni irsin mühafizəsi məsələsinin aktuallığı, ksenofobiya, qanunsuz miqrasiya və digər sahələri əhatə edəcək.

Forumda 100-dən çox ölkəni təmsil edən 700 qonaq iştirak edəcək. Yüksək səviyyəli dövlət xadimləri, parlament rəhbərləri, dini liderlər, alimlər, jurnalistlər və müxtəlif etnik və mədəni qrupa daxil olan şəxslərdən ibarət iştirakçılar mənalı dialoq vasitəsilə sülh və qlobal təhlükəsizliyə doğru irəliləyişə nail olmaq üçün bir araya gələcəklər. Üç gün davam edəcək Forum çərçivəsində 12 panel müzakirə və 4 plenar sessiyanın keçirilməsi nəzərdə tutulur.

Üç gün ərzində panellərdə “Çoxtərəfli əməkdaşlığın inkişafında yumşaq gücün tətbiqi: həmrəyliyin möhkəmləndirilməsi və parçalanmaya qarşı müqavimət”, “Sülh və qlobal təhlükəsizlik naminə nəsillərarası dialoq”, “Müxtəliflik harmoniyası: qlobal mədəni intibah naminə mədəniyyətlərarası dialoqun təşviqi”, “Yaşıl gələcəyə davamlı yol: COP29 və sonrakı dövr üçün birgə fəaliyyət”, “Təhsilin və gənclərin ayrı-seçkilik və ksenofobiya ilə mübarizəyə cəlb edilməsinin rolu”, “Tənzimlənməyən miqrasiya və sosial təsirlər: beynəlxalq təhlükəsizlik üçün təhdid və imkanlar”, “Süni intellekt – təhdid, yoxsa imkan?”, “Mədəniyyətlərarası dialoqlarda qadın hüquqlarının təşviqi; Qlobal inkişafa doğru”, “Dinlərarası dialoq vasitəsilə etimadın möhkəmləndirilməsi” mövzularında müzakirələr aparılacaq.

Forum iştirakçılarının Azərbaycanın 30 illik işğaldan azad edilmiş ərazilərinə səfərlərinin təşkili də gözlənilir. Tədbir çərçivəsində Ağdamda və Şuşada xüsusi panel sessiyaların keçirilməsi də nəzərdə tutulur.

Mayın 4-də Heydər Əliyev Mərkəzində “20 ilin sədası” konsert proqramı təqdim olunacaq.

Bununla bağlı ShekiMedia.az-a Heydər Əliyev Fondundan məlumat verilib.

Qeyd edilib ki, konsert həm iştirakçıları, həm də repertuarı ilə rəmzi məna daşıyır. Belə ki, bu il yaranmasının 20 ili tamam olan Heydər Əliyev Fondu fəaliyyəti dövründə hər zaman gənc istedadlara, mədəniyyət və insəcənət sahəsinə dəstək göstərib, mədəniyyətimizin geniş təbliğinə yönələn layihələr həyata keçirib.

Heydər Əliyev Fondu istər gənclərimizin təhsil almasına, istərsə də beynəlxalq müsabiqə və festivallarda iştirakına dəstək olub. Fondun ayrı-ayrı sahələrdəki layihələri, o cümlədən muğam müsabiqələri, milli, klassik və caz musiqisi ilə bağlı layihələri, müxtəlif musiqi festivalları yeni istedadların üzə çıxarılmasına, onların inkişafına təkan verib.

Mayın 4-dəki konsert proqramında da məhz bu incəsənət xadimləri – Heydər Əliyev Fondunun yaradıcılıqlarında iz qoyduğu, dönüş və sıçrayış yaratdığı, dəstək göstərdiyi mədəniyyət və incəsənət xadimləri – Azər Zadə (tenor), Azər Zeynalov (tenor), Ceyla Seyidova (violin), Elçin Əzizov (bariton), Emil Əfrasiyab (piano), Elvin Hoca Qəniyev (violin), Fərhad Bədəlbəyli (piano), İsfar Sarabski (piano), Mirələm Mirələmov (xanəndə), Murad Adıgözəlzadə (piano), Samir Cəfərov (tenor), Təyyar Bayramov (xanəndə) və digərləri çıxış edəcək.

Birinci vitse-prezident Mehriban Əliyevanın rəhbərliyi ilə 20 illik fəaliyyətində ulu öndər Heydər Əliyevin ideyalarına əsaslanan, elm və təhsil, səhiyyə, sosial və digər sahələrdəki önəmli layihələri ilə mühüm nailiyyətlərə imza atan, ən əsası isə insanların sevgi və inamını qazanan Heydər Əliyev Fondunun gördüyü işlərdə milli-mədəni, mənəvi dəyərlərimizin qorunub saxlanılması, onların təbliği xüsusi önəm kəsb edir. Heydər Əliyev Fondu ötən illərdə mədəniyyət sahəsinin inkişafına öz töhfələrini verib və Fondun 20 illiyi ərəfəsində keçirilən konsert də həmin uğurların kiçik bir hissəsinin nümayişi sayıla bilər.