ELM VƏ TƏHSİL

Ekspert: “DİM abituriyent və tələbələrdən təhsil müddətində aldıqları bilikləri tələb etməlidir”

“Esse tələbi o zaman ağlabatan qərar olar ki, ümumi təhsil məktəblərinin məzunlarının ən azı 50 faizi xarici dil bilgisinə sahib olsun. Ali məktəb məzunlarının isə ən azı 70 faizi universitet auditoriyasından xarici dili öyrənib, çıxa bilsin. Daha aydın desək, DİM-in abituriyent və tələbələrdən təhsil müddətində aldıqları bilikləri tələb etməsi daha düzgündür”.

Bunu açıqlamasında təhsil eksperti Rizvan Fikrətoğlu magistratura imtahanlarına edilən dəyişikliklə bağlı fikirlərini bölüşərkən deyib.

Ekspert sözügedən yeniliyin müəyyən problemlər yaradacağını düşünür:

“Hesab edirəm ki, Dövlət İmtahan Mərkəzinin magistraturaya qəbul qaydalarını çətinləşdirməsi yenidən tələbə olmaq istəyənlərin müxtəlif proqramlara müraciət edərək rahat şəkildə xaricdə təhsil almağa üstünlük vermələrinə gətirib çıxaracaq.

Məzuna “zəhmət çəkib öyrənərdin” və ya “hazırlığa get, öyrən” demək də düzgün olmaz. Hər yenilik repetitorların, kursların, “Əlabbasın torbası”nı genişləndirəcəksə, bu, inkişaf deyil. Gənclərin dil problemini hələ orta məktəbdən, ali məktəbdən başlayaraq həll etmək lazımdır.

Ümumiyyətlə, magistratura imtahanını çətinləşdirməyin müsbət tərəfləri məqbul hesab edilə bilməz. Gənclərin xarici dil biliklərinin artırılması üçün esse yazma bacarıqlarının inkişaf etdirilməsi ali məktəbdə tədris prosesində normal tələb hesab edilə bilər”.

R.Fikrətoğlu hesab edir ki, şəxs magistraturaya qəbul olmaq istəyirsə və bir neçə mərhələ keçibsə, esse yazmaq, tənqidi mühakimə yürütmək qabiliyyəti olmalıdır:

“Amma burada da istedad məsələsi var. Məsələn, şəxs IT mütəxəssisidir, sahəsini yaxşı bilir. O, esse yaza bilmir deyə, biliyinin zəif olduğu qənaətinə gəlmək doğru deyil. Əksini də düşünə bilərik – kimsə yaxşı danışa, yaza bilirsə, istedadlıdır demək deyil. Bu yenilik sadəcə bir qisim insanın istedadını üzə çıxara biləcək.

Başqa bir məsələ yoxlama prosesində insan amilinin olmasıdır. Belə desək, esse yazanın bilikləri və dünyagörüşü ilə onu yoxlayan şəxsin bilik və dünyagörüşü fərqlilik yarada bilər. Bu da qiymətləndirmədə problem ola bilər. Əvvəlcə esse ilə bağlı bir sıra addımlar atılmalı, alınan nəticələrə uyğun hərəkət edilməlidir. Bunun birbaşa imtaha salınması düzgün deyil”.

Qeyd edək ki, DİM magistraturaya qəbul imtahanına dəyişiklik edib. Artıq bakalavrlar yazı bacarıqlarının yoxlanılması üçün ingilis dilində onlara təqdim edilən iki esse mövzusundan birini seçməklə həmin mövzu ətrafında fikirlərini ifadə edəcəklər./demokrat.az

Oxşar xəbərlər:

Up Next

Azərbaycan Ordusunun polkovnik-leytenantı Çində mükafatlandırıldı

Don't Miss

İsveçdə Quranı yandıran şəxs ölkədən qovulacaq

Burada şərh yaz

ELM VƏ TƏHSİL

Azərbaycan və Türkiyənin təhsil nazirləri əməkdaşlığı müzakirə ediblər

Ankarada səfərdə olan Azərbaycanın elm və təhsil naziri Emin Əmrullayev türkiyəli həmkarı Yusuf Tekinlə görüşüb.

Bu barədə Türkiyənin Milli Təhsil Nazirliyinin mətbuat xidməti bildirib.

“Nazir Tekin Türkiyə-Azərbaycan Qarışıq İqtisadi Komissiyasının (QİK) 11-ci Dövr Toplantısı münasibətilə Türkiyədə səfərdə olan Azərbaycanın təhsil naziri Emin Əmrullayevlə görüşüb”, – mətbuat xidməti diqqətə çatdırıb.

Qeyd olunub ki, nazirlərin görüşündə “iki ölkə arasında davam edən və planlanan təhsil əməkdaşlığı mövzularında fikir mübadiləsi aparılıb”.

Davamına bax

ELM VƏ TƏHSİL

Pedaqoq və təhsil işçisi Elxan Abdullayevin doğum günüdür

Bu gün tanınmış pedaqoq və təhsil işçisi, Şəki-Zaqatala Regional Təhsil İdarəsinin baş məsləhətçisi Elxan Abdullayevin doğum günüdür.

O, 8 may 1961-ci il tarixdə Nuxada (indiki Şəki) anadan olub.

1967 – 1977-ci illərdə əvvəl Nuxa/Şəki şəhər 16 №-li ibtidai məktəbində, sonra Şəki şəhər 11 №-li orta məktəbində, daha sonra isə Maksim Qorki adına Şəki şəhər 10 №-li orta məktəbdə, 1977 – 1982-ci illərdə isə S.M.Kirov adına Azərbaycan Dövlət Universitetinin mexanika-riyaziyyat fakültəsində təhsil alıb.

1982-ci ilin sentyabr ayından M.Qorki adına Şəki şəhər 10 №-li orta məktəbində müəllim, 1987-ci ilin sentyabr ayından Şəki Şəhər Təhsil Şöbəsində məktəblər üzrə inspektor (məsləhətçi), 2005-ci ilin mart ayından 2011-ci ilin iyul ayına qədər Şəki şəhər Rəşid bəy Əfəndiyev adına 10 №-li tam orta məktəbinin direktoru, 2011-ci ilin iyul ayından isə Şəki Şəhər Təhsil Şöbəsi müdirinin müavini vəzifəsində çalışıb. 29 dekabr 2021-ci il tarixdən Şəki Şəhər Təhsil Şöbəsinin müdiri, 2022-ci ilin may ayından Şəki rayonu üzrə təhsil sektorunun müdiri vəzifəsini icra edib. 2023-cü ilin fevral ayından Şəki-Zaqatala Regional Təhsil İdarəsinin baş məsləhətçisidir.

“Azərbaycan Respublikası qabaqcıl təhsil işçisi” döş nişanı (2021), Təhsil İşçiləri Azad Həmkarlar İttifaqının (ATİAHİ) “Azərbaycan Həmkarlar İttifaqları – 100 il” yubiley medalı (2021) ilə təltif olunub.

Ailəlidir, 2 övladı və 4 nəvəsi var.

Davamına bax

ELM VƏ TƏHSİL

“Peşəkar jurnalistikanın əsasları” adlı onlayn təlim kursu istifadəyə verilib

Azərbaycanın Medianın İnkişafı Agentliyinin (MEDİA), Media Təhlil Mərkəzinin, “EDUAZ Co” MMC-nin və Türkiyənin Anadolu Agentliyinin birgə əməkdaşlığı çərçivəsində hazırlanmış “Peşəkar jurnalistikanın əsasları” adlı onlayn təlim kursu istifadəyə verilib.

MEDİA-dan bildirilib ki, “eduaz.com” platformasında təqdim edilən kursun əsas məqsədi müasir media mühitində dəyişən tendensiyaları nəzərə alaraq, media sahəsində təlimlərin əhatə dairəsinin genişləndirilməsi, bu sahədə mütəxəssislərin hazırlanması, media nümayəndələrinin fəaliyyətinin təkmilləşdirilməsi, beynəlxalq təcrübənin hər kəs üçün əlçatanlığının təmin olunmasıdır.

Onlayn təlim kursunda mövzular 12 moduldan ibarət olmaqla Anadolu Agentliyinin yüksək ixtisaslı ekspertləri tərəfindən tədris olunur. Hər modulun və ümumi təlimin sonunda müvafiq olaraq özünüqiymətləndirmə testini və sertifikat imtahanını verən iştirakçı nəticəyə uyğun “iştirak” və ya “müvəffəqiyyət” sertifikatı əldə edir.

Dövlət və özəl əməkdaşlıq layihəsi çərçivəsində təqdim olunan kursdan Media Reyestrində olan jurnalistlər ödənişsiz yararlana biləcəklər.

Onlayn kurs media sahəsində biliklərini təkmilləşdirmək istəyən şəxslərə zaman və məkan məhdudiyyəti olmadan rahat funksionallıq, öyrəndiklərini yoxlama və sertifikat qazanma imkanı təklif edir.