QAX

Qaxda içməli su problemi sakinlərin narazılığına səbəb olub

Qaxın Almalı kəndinin içməli su problemi sakinlərin narazılıqlarına səbəb olub.

Kənd sakinləri bildiriblər ki, içməli suya olan tələbat yay aylarında daha çox olduğundan, su çatışmazlığı da elə bu fəsildə yaşanır:

“Havaların isti və quraq keçməsi isə vəziyyəti daha da çətinlişdirir. Əgər hansısa yaşayış məntəqəsində su problemi varsa, bu problem əsasən yay fəslində özünü daha qabarıq göstərir. Almalı kəndində içməli su problemi uzun illərdir ki, davam edir”.

Sakinlərinin sözlərinə görə, su problemi daha çox kəndin Qaraqamış adlanan ərazisində yaşanır:

“Burada yaşayan 60 ailə hər gün evlərinin yaxınlığında olan artezian quyusunda növbə gözləmək məcburiyyətində qalırlar. Kənddə yerləşən bulaqların quruması vəziyyəti daha da gərginləşdirir. Almalı sakinləri su daşımaq üçün mümkün olan bütün vasitələrdən istifadə edirlər. Onlar suyu müxtəlif ərazilərdən at arabalarına qoşulmuş su çənləri vasitəsi ilə gətirirlər. Sakinlər bildirirlər ki, bütün işlərini atıb yalnız su gətirməklə məşğul olurlar”.

Almalı kənd bələdiyyəsinin sədri Arzu Səfərova “Report”un Şimal-qərb bürosuna bildirib ki, kənddə su problemi bir neçə ildir ki var:

“Burada 450 fərdi təsərrüfatda 2 mindən çox insan yaşayır. İçməli suya olan tələbatı ödəmək məqsədi ilə kəndin müxtəlif ərazilərində 12 artezian su quyusu qazılsa da, bu quyulardan əksəriyyətindən ya su çıxmır, ya da suyun təziqi çox aşağıdır”.

A.Səfərova əlavə edib ki, sakinlərin içməlin suya olan təlabatlarını ödəmək və bu problemi həll etmək üçün aidiyyəti qurumlara müraciət ünvanlanıb: “Sakinlərin içməli suya olan tələbatlarını ödəmək üçün istər şifahi, istər yazılı bütün aidiyyəti orqanalara məlumat vermişik. Problemin həll olunmasını gözləyirik. Kənd ərazisində tyerləşən artezian quyuları Qax Suvarma Sistemləri İdarəsinin balansındadır”.

Qax Suvarma Sistemləri İdarəsindən isə bildirildi ki, idarənin balansında 89 subartezian quyusu, 56 artezian quyusu mövcuddur:

“Almalı kənd ərazisində 9 ədəd quyu yerləşir. Onlardan da 5-i artezian, 4-ü isə subartezian quyudur. Almalı kəndi Alazan vadisində yerləşdiyi üçün qrunt suları orada çox aşağı səviyyədədir. Quyulardan su çıxmamağının səbəbi yaxınlıqdan Alazan çayının keçməsidir ki, çay da dərində olan suları özünə çəkir. Sakinlərə bir-neçə il əvvəl qazılan quyuların kəndin mərkəzində yox, yuxarı hissəsində qazılması təklif olunub. Əgər həmin ərazidə quyular qazılarsa kəndin bir hissəsi içməli su ilə təmin olunar”.

Oxşar xəbərlər:

Up Next

Sentyabr ayı üçün nazirlərin qəbul günləri açıqlanıb – SİYAHI

Don't Miss

Saleh Məmmədov Qaxda vətəndaşları qəbul edib

Burada şərh yaz

QAX

Qax rayon Heydər Əliyev Mərkəzində “Heydər Əliyev gənclərin ilham mənbəyidir” adlı tədbir keçirilib – FOTOLAR

08 may 2024-cü il tarixində Qax rayon Heydər Əliyev Mərkəzində Qax rayon Heydər Əliyev Mərkəzinin və Ailə, Qadın və Uşaq Problemləri üzrə Dövlət Komitəsi yanında fəaliyyət göstərən Uşaq Səfirlər Məclisinin Qax rayonu üzrə nümayəndələrinin birgə təşkilatçılığı ilə “Heydər Əliyev gənclərin ilham mənbəyidir” adlı tədbir keçirilib.

ShekiMedia.az xəbər verir ki, tədbiri keçirməkdə məqsəd müstəqil Azərbaycanın qurucusu, əvəzolunmaz lider Heydər Əliyevin həyat və fəaliyyəti ilə gənc nəsli tanış etmək olub.

Tədbirdə iştirakçılar arasında Heydər Əliyevin 101 illiyinə həsr olunmuş iki mərhələli intellektual yarış keçirilib.

Tədbirin sonunda Heydər Əliyevin həyatına həsr olunmuş ”Bir dahi ömrü “ və “ Tarix yazan imza “ adlı video çarx nümayiş etdirilib.

Davamına bax

MƏDƏNİYYƏT

Animator-rəssam Mehriban Əliyevanın təqdimat mərasimi keçirilib

03.05.2024-cü il tarixində Qax rayon Heydər Əliyev Mərkəzində Mədəniyyət Nazirliyi tərəfindən həyata keçirilən “Yaradıcı müzakirələr” layihəsi çərçivəsində “Animaevka – 2023” XXVI Beynəlxalq Animasiya Film Festivalında “Ən yaxşı animasiya rəssamı” nominasiyasında qalib olmuş şəkili gənc, animator-rəssam Mehriban Əliyevanın təqdimat mərasimi keçirilib.

Təqdimat mərasimində gənc rejissor Yusif Mustafayevin studio işləri təqdim edilib, həmçinin “Baxış”qrupunun yaradıcısı, gənc motivator Ərtur Baxışın “Gənc yaşda lider olmaq” mövzusunda həmyaşıdları ilə fikir mübadiləsi həyata keçirilib.

Qeyd etmək lazımdır ki, layihə yaradıcı şəxslərin formalaşmasının dəstəklənməsinə yönəlib.

Davamına bax

CƏMİYYƏT

Qaxda Aşağı Malax-Qaşqaçay-Armudlu yolu yenidən qurulub – FOTOLAR

Qax-Qaşqaçay-Armudlu avtomobil yolunun 11-ci km-dən ayrılan və uzunluğu 12,5 km olan Aşağı Malax-Qaşqaçay-Armudlu yaşayış məntəqələrini əlaqələndirən avtomobil yolları əsaslı şəkildə yenidən qurulub.

Azərbaycan Avtomobil Yolları Dövlət Agentliyindən verilən məlumata görə, IV texniki dərəcəyə uyğun olaraq yenidən qurulan yolun eni 10 metrdir.

Aparılan işlər çərçivəsində texnoloji ardıcıllığa uyğun olaraq torpaq işləri, yeni yol əsasının inşası yerinə yetirilib, yolboyu yeni asfalt-beton örtüyünün döşənməsi işləri aparılıb.

Layihə üzrə yolun Qaşqaçay hissəsində 830 və 150 metr uzunluğa malik iki köhnə arx qazılaraq, yenidən tikilib. Uzunluğu 830 metr olan arxın ətrafına 640 p/m səki daşı düzülüb, 200 metr uzunluğunda istinad divarının, suların ötürülməsini təmin etmək məqsədilə müxtəlif ölçülü suötürücü boruların da inşası aparılıb.

Tikinti çərçivəsində Qaşqaçay-Armudlu kənd yollarını birləşdirən 2 aşırımlı, 36 metr uzunluğa malik yeni avtomobil körpüsü inşa olunub.

Uzun müddət əsaslı şəkildə təmir olunmayan yolların yenidən qurulmasında məqsəd yolboyu 3 yaşayış məntəqəsinin 1600 nəfər əhalisinin rahat gediş-gəlişini təmin etmək, yük və sərnişin daşımasını asanlaşdırmaqdır.

Sözügedən yollarda işlər “İnşaat Norma və Qaydaları”na əsasən Agentliyin rəhbərliyinin nəzarəti altında icra olunub.

Tikinti layihəsinin sonuncu mərhələsində avtobus dayanacaqlarının, yol nişanlarının quraşdırılması və yolun üfüqi nişanlanma xətlərinin çəkilişi aparılmaqla yol müasir görkəmdə vətəndaşların istifadəsinə verilib.